ఉమెన్స్ పోల్ వాల్ట్‌లో చారిత్రక కాంస్యం గెలిచిన బరణిక ఎలంగోవన్

సూర్య స్పోర్ట్స్ డెస్క్: జపాన్‌లోని ఐచి-నాగోయా వేదికగా జరుగుతున్న ఆసియా గేమ్స్ 2026లో భారత అథ్లెట్ బరణిక ఎలంగోవన్ సరికొత్త చరిత్ర సృష్టించారు. శుక్రవారం జరిగిన మహిళల పోల్ వాల్ట్ ఫైనల్లో 4.15 మీటర్ల ఎత్తును అధిగమించి కాంస్య పతకాన్ని కైవసం చేసుకున్నారు. ఆసియా గేమ్స్ చరిత్రలోనే పోల్ వాల్ట్ విభాగంలో పతకం సాధించిన తొలి భారతీయ అథ్లెట్‌గా 29 ఏళ్ల బరణిక రికార్డు పుటలకెక్కారు. కజకిస్తాన్‌కు చెందిన పొలినా ఇవనోవా కూడా సరిగ్గా 4.15 మీటర్ల ఎత్తును దాటడంతో పాటు సేమ్ కౌంట్‌బ్యాక్ రికార్డు నమోదు చేయడంతో ఇద్దరినీ సంయుక్తంగా కాంస్య విజేతలుగా ప్రకటించారు.

తమిళనాడుకు చెందిన బరణికకు 2026 సంవత్సరం అద్భుతమైన ఫామ్‌తో సాగుతోంది. ఈ ఏడాది ఆమె రెండుసార్లు జాతీయ రికార్డును తిరగరాశారు. మార్చిలో 4.22 మీటర్లు దాటిన ఆమె, మే నెలలో భువనేశ్వర్‌లో జరిగిన పోటీల్లో 4.23 మీటర్ల ఎత్తును చేరుకుని సరికొత్త నేషనల్ రికార్డ్ నెలకొల్పారు. అదే జోరుతో ఆసియా గేమ్స్ క్వాలిఫైయింగ్ మార్క్ అయిన 4.10 మీటర్లను దాటి భారత జట్టులో చోటు దక్కించుకుని, నాగోయాలో పతకంతో దేశ కీర్తిపతాకాన్ని ఎగురవేశారు. కాగా, ఈ ఈవెంట్‌లో పాల్గొన్న మరొక భారత పోల్ వాల్టర్ సింధుశ్రీ గణేశ ఫైనల్లో చెల్లుబాటయ్యే ఎత్తును దాటలేక పతక రేసు నుంచి నిష్క్రమించారు.

మరోవైపు అథ్లెటిక్స్ విభాగంలో భారత్‌కు శుక్రవారం రెండు పతకాలు లభించాయి. పురుషుల 10,000 మీటర్ల పరుగు పందెంలో భారత అథ్లెట్ గుల్వీర్ సింగ్ 28:29.38 నిమిషాల్లో లక్ష్యాన్ని చేరి వెండి పతకం సాధించారు. గతంలో హ్యాంగ్‌జౌ ఆసియా గేమ్స్‌లో కాంస్యం గెలిచిన గుల్వీర్, ఆసియా గేమ్స్ పురుషుల 10,000 మీటర్ల విభాగంలో రెండు పతకాలు సాధించిన మొదటి భారతీయ అథ్లెట్‌గా నిలిచారు. బహ్రెయిన్‌కు చెందిన బిర్హాను బలేవ్ ఈ రేసులో స్వర్ణ పతకాన్ని కైవసం చేసుకున్నారు.