యూఈ వాణిజ్య కమిషనర్‌తో భేటీ అయిన కేంద్ర మంత్రి పీయూష్ గోయల్
సూర్య జాతీయ డెస్క్: భారత్ మరియు యూరోపియన్ యూనియన్ (ఈయూ) మధ్య చారిత్రాత్మక స్వేచ్ఛా వాణిజ్య ఒప్పందం (ఎఫ్‌టీఏ) అమలు దిశగా చర్చలు వేగవంతమయ్యాయి. అమెరికాలోని మిల్వాకీలో జరుగుతున్న జీ20 వాణిజ్య మంత్రుల సమావేశం సందర్భంగా కేంద్ర వాణిజ్య శాఖ మంత్రి పీయూష్ గోయల్.. ఈయూ వాణిజ్య మరియు ఆర్థిక భద్రతా కమిషనర్ మారొస్ సెఫ్కోవిచ్‌తో సమావేశమయ్యారు. ఈ భేటీలో భాగంగా ఇరు దేశాల మధ్య కుదిరిన ఎఫ్‌టీఏ ఒప్పందానికి సంబంధించిన విధివిధానాలు, త్వరలో జరగనున్న ఒప్పంద సంతకం మరియు అమలు ప్రక్రియపై ఇద్దరు నేతలు సమగ్రంగా సమీక్షించారు.
ఈ సమావేశం అనంతరం సోషల్ మీడియా వేదికగా పీయూష్ గోయల్ స్పందిస్తూ.. యూఈ కమిషనర్ మారొస్ సెఫ్కోవిచ్‌తో జరిపిన చర్చలు అత్యంత ఫలప్రదంగా సాగాయని తెలిపారు. భారత్-ఈయూ వాణిజ్య, సాంకేతిక మండలి (టీటీసీ) పురోగతి, ప్రపంచ వాణిజ్య సంస్థ (డబ్ల్యూటీవో) సంస్కరణలు మరియు జీ-20 ప్రాధాన్యతలపై ఇరువురు నేతలు అభిప్రాయాలను పంచుకున్నారు. కాగా, దాదాపు రెండు దశాబ్దాల సుదీర్ఘ చర్చల తర్వాత ఈ ఏడాది జనవరిలో భారత్-ఈయూ స్వేచ్ఛా వాణిజ్య ఒప్పందం ఖరారైంది. ఈ ఒప్పందాన్ని అధికారికంగా ఆమోదించి సంతకం చేసేందుకు గత సెప్టెంబర్ 11న యూరోపియన్ కమిషన్ అధికారికంగా అభ్యర్థన సమర్పించింది.
'అన్ని ఒప్పందాలకు తల్లి' (మదర్ ఆఫ్ ఆల్ డీల్స్) గా అభివర్ణిస్తున్న ఈ ప్రతిష్టాత్మక ఎఫ్‌టీఏపై ఈ ఏడాదిలోనే అధికారిక సంతకాలు పూర్తికానున్నాయి. 2027 ప్రారంభం నాటికి ఇది పూర్తిస్థాయిలో అమల్లోకి వస్తుందని భావిస్తున్నారు. ఈ ఒప్పందం అమల్లోకి వస్తే ఇరు ఆర్థిక వ్యవస్థల మధ్య సుంకాలు భారీగా తగ్గడంతో పాటు మార్కెట్ ప్రవేశం సులభమవుతుంది. అలాగే వాణిజ్యం, పెట్టుబడులకు సంబంధించి మరింత పారదర్శక నిబంధనలు ఏర్పడతాయి. ప్రస్తుతం భారత్-ఈయూ మధ్య ఏటా సుమారు 180 బిలియన్ యూరోల విలువైన వస్తువులు, సేవల రాకపోకలు సాగుతుండగా, ఈ ఒప్పందంతో ద్వైపాక్షిక వాణిజ్యం మరింత పుంజుకుంటుందని ఆర్థిక నిపుణులు అంచనా వేస్తున్నారు.
