లిథియం, నికెల్ ప్రాసెసింగ్‌కు ₹2,814 కోట్ల పథకం
సూర్య నేషనల్ డెస్క్, న్యూఢిల్లీ: దేశంలో కీలక ఖనిజాల రంగంలో స్వయం సమృద్ధి సాధించడంతో పాటు విద్యుత్ వాహనాలు, బ్యాటరీ తయారీకి అవసరమైన ముడి పదార్థాల సరఫరాను బలోపేతం చేసే దిశగా కేంద్ర ప్రభుత్వం భారీ నిర్ణయం తీసుకుంది. దేశీయంగా లిథియం, నికెల్ ఖనిజాల ప్రాసెసింగ్‌ను ప్రోత్సహించేందుకు రూ.2,814 కోట్ల మూలధన వ్యయ ప్రోత్సాహక పథకానికి (Capex Support Scheme) ప్రధానమంత్రి నరేంద్ర మోదీ అధ్యక్షతన సమావేశమైన కేంద్ర కేబినెట్ ఆమోదం తెలిపిందని కేంద్ర బొగ్గు, గనుల శాఖ మంత్రి జి. కిషన్ రెడ్డి వెల్లడించారు. దేశంలో తొలిసారిగా భారీ వాణిజ్య స్థాయిలో ఈ కీలక ఖనిజాల శుద్ధి కర్మాగారాలను ఏర్పాటు చేయడమే లక్ష్యంగా ఈ పథకాన్ని రూపొందించినట్లు ఆయన స్పష్టం చేశారు.
ఈ పథకం ద్వారా ఏటా 60,000 టన్నుల లిథియం, లక్ష టన్నుల నికెల్ శుద్ధి సామర్థ్యాన్ని అభివృద్ధి చేయాలని లక్ష్యంగా పెట్టుకున్నామని కిషన్ రెడ్డి తెలిపారు. ఈ సామర్థ్యం 2030 నాటికి దేశీయంగా ఏర్పడే డిమాండ్‌కు గణనీయమైన ఊతాన్ని ఇస్తుందని ఆయన పేర్కొన్నారు. అంతేకాకుండా ఈ కార్యక్రమం ద్వారా దాదాపు ₹10,000 కోట్ల మేర ప్రైవేట్ పెట్టుబడులు రావడంతో పాటు ₹25,000 కోట్ల విలువైన ఉత్పత్తి సాధ్యమవుతుందని కేంద్ర ప్రభుత్వం అంచనా వేస్తోంది. ఆధునిక సాంకేతిక పరిజ్ఞానం బదిలీతో పాటు వేలాది మంది నిపుణులకు ఉపాధి అవకాశాలు లభిస్తాయని మంత్రి వివరించారు.
అంతర్జాతీయ మార్కెట్లలో భౌగోళిక-రాజకీయ అనిశ్చితులు, సరఫరా గొలుసులో తలెత్తే అంతరాయాల నుంచి దేశీయ పరిశ్రమలకు రక్షణ కల్పించేందుకు ఈ నిర్ణయం ఎంతగానో దోహదపడుతుందని కేంద్రం భావిస్తోంది. దిగుమతులపై ఆధారపడటాన్ని తగ్గించి, 'ఆత్మనిర్భర్ భారత్' లక్ష్యాలను సాకారం చేయడంలో ఈ ప్రాసెసింగ్ కేంద్రాలు కీలక మైలురాయిగా నిలుస్తాయని అధికారులు వెల్లడించారు.
