పాత వాహనాలకు భారత్ (BH) సిరీస్ నంబర్ ప్లేట్
సూర్య డెస్క్: ఉద్యోగ రీత్యా తరచూ ఇతర రాష్ట్రాలకు బదిలీ అయ్యే ఉద్యోగులకు వాహన రిజిస్ట్రేషన్ బదిలీల నుంచి విముక్తి కల్పించేందుకు కేంద్ర ప్రభుత్వం ప్రవేశపెట్టిన ప్రతిష్టాత్మక 'భారత్ సిరీస్' (BH Series) నంబర్ ప్లేట్లపై రవాణా శాఖ కీలక వెసులుబాటు కల్పించింది. ఇప్పటివరకు కేవలం సరికొత్త వాహనాల కొనుగోలు సమయంలో మాత్రమే అందుబాటులో ఉన్న ఈ సౌలభ్యాన్ని, ప్రస్తుతం వినియోగిస్తున్న పాత వాహనాలకు కూడా వర్తింపజేసేందుకు కేంద్రం అనుమతినిచ్చింది. దీంతో ఇతర రాష్ట్రాల నంబర్ ప్లేట్లతో రిజిస్ట్రేషన్ కలిగి ఉన్న వాహనాలను సైతం సులభంగా బీహెచ్ సిరీస్‌లోకి మార్చుకునే వెసులుబాటు లభించింది.
ఎవరెవరు అర్హులు?
ఈ ప్రత్యేక సదుపాయం కేంద్ర, రాష్ట్ర ప్రభుత్వ ఉద్యోగులు, రక్షణ రంగంలో పనిచేసే సిబ్బందితో పాటు కనీసం నాలుగు రాష్ట్రాలు లేదా కేంద్రపాలిత ప్రాంతాల్లో కార్యాలయాలు ఉన్న ప్రైవేట్ రంగ సంస్థల ఉద్యోగులకు వర్తిస్తుంది. తరచూ వివిధ రాష్ట్రాలకు బదిలీ అయ్యే ఉద్యోగులు తమ వాహనాన్ని కొత్త రాష్ట్రానికి తీసుకెళ్లినప్పుడు ఎదురయ్యే రీ-రిజిస్ట్రేషన్ ఇబ్బందులు, నిరభ్యంతర పత్రం (NOC) పొందడం వంటి వ్యయప్రయాసల నుంచి తప్పించుకునేందుకు బీహెచ్ సిరీస్ ఎంతో ప్రయోజనకరంగా ఉంటుంది.
దరఖాస్తు విధానం – ఫారం 27A
అర్హత కలిగిన వాహన యజమానులు తమ పాత రిజిస్ట్రేషన్‌ను బీహెచ్ సిరీస్‌గా మార్చుకోవడానికి 'ఫారం 27A' (Form 27A) ద్వారా రవాణా శాఖకు దరఖాస్తు చేసుకోవాల్సి ఉంటుంది. దీనితో పాటు ఉద్యోగ ధ్రువీకరణ పత్రం (వర్కింగ్ సర్టిఫికేట్ లేదా ఫారం 60) సమర్పించి అవసరమైన రోడ్డు పన్నును చెల్లించాల్సి ఉంటుంది. ఒకసారి బీహెచ్ సిరీస్ నంబర్ పొందిన తర్వాత దేశంలోని ఏ రాష్ట్రానికి మారినా మళ్లీ రీ-రిజిస్ట్రేషన్ చేయించుకోవాల్సిన అవసరం ఉండదు, కేవలం రోడ్ ట్యాక్స్‌ను రెండేళ్లకు ఒకసారి ఆన్‌లైన్ ద్వారా చెల్లిస్తే సరిపోతుంది.
