ఛత్తీస్గఢ్లో ఘోర రోడ్డు ప్రమాదం.. ఆగివున్న వాహనాన్ని ఢీకొన్న లారీ, ఆరుగురు దుర్మరణం, 11 మందికి గాయాలు
సూర్య క్రైమ్ డెస్క్: ఛత్తీస్గఢ్లోని బాలోద్ జిల్లా పరిధిలో శుక్రవారం ఘోర రోడ్డు ప్రమాదం సంభవించింది. జాతీయ రహదారి 30 పై ఉన్న మర్కటోలా ఘాట్ వద్ద ఆగివున్న మినీ గూడ్స్ వాహనాన్ని గోధుమల లోడుతో వేగంగా వచ్చిన భారీ లారీ వెనుక నుంచి బలంగా ఢీకొట్టింది. ఈ ఘోర దుర్ఘటనలో ఒకే మ్యూజిక్ బృందానికి చెందిన ఆరుగురు కళాకారులు మృతి చెందగా, మరో పదకొండు మంది తీవ్రంగా గాయపడ్డారు. సంఘటనా స్థలానికి సమీపంలో గోధుమ బస్తాలు చెల్లాచెదురుగా పడిపోవడంతో సహాయక చర్యలు ముమ్మరంగా చేపట్టారు.
కబీర్ధామ్ జిల్లా కవర్ధాకు చెందిన ధుమాల్ మ్యూజిక్ బ్యాండ్ బృందం జగదల్పూర్కు వెళ్తుండగా మార్గమధ్యంలో వీరి వాహనం సాంకేతిక సమస్యతో నిలిచిపోయింది. వాహన మరమ్మతు కోసం కొందరు మెకానిక్ వద్దకు వెళ్లగా, మిగిలిన వారు అక్కడే ఉన్నారు. ఈ క్రమంలో రాయ్పూర్ నుంచి వస్తున్న పదహారు చక్రాల భారీ ట్రక్కు నియంత్రణ కోల్పోయి వాహనాన్ని ఢీకొట్టి సుమారు యాభై మీటర్ల మేర ఈడ్చుకెళ్లి బోల్తా పడింది. ఇద్దరు వ్యక్తులు అక్కడికక్కడే మరణించగా, మరో నలుగురు ఆసుపత్రిలో చికిత్స పొందుతూ ప్రాణాలు విడిచారు.
గాయపడిన వారిలో పరిస్థితి విషమంగా ఉన్న ఏడుగురిని మెరుగైన వైద్యం కోసం రాయ్పూర్ తరలించారు. ప్రమాదం అనంతరం పరారైన లారీ డ్రైవర్ కోసం పోలీసులు గాలింపు చర్యలు చేపట్టారు. ఈ హృదయ విదారక ఘటనపై ఛత్తీస్గఢ్ ముఖ్యమంత్రి విష్ణుదేవ్ సాయి తీవ్ర దిగ్భ్రాంతి వ్యక్తం చేస్తూ క్షతగాత్రులకు మెరుగైన వైద్యం అందించాలని అధికారులను ఆదేశించారు.
