పునర్వినియోగ రాకెట్ తయారీకి ₹200 కోట్ల భారీ ఆర్థిక సాయం

సూర్య సైన్స్ అండ్ టెక్నాలజీ డెస్క్: స్వదేశీ పునర్వినియోగ అంతరిక్ష రవాణా వ్యవస్థల (Reusable Space Transportation Systems) అభివృద్ధిలో భారతదేశం మరొక కీలక మైలురాయిని చేరుకుంది. అందులో భాగంగా చెన్నైకి చెందిన ప్రముఖ స్పేస్ స్టార్టప్ 'అగ్నికుల్ కాస్మోస్' ప్రైవేట్ లిమిటెడ్‌కు కేంద్ర సైన్స్ అండ్ టెక్నాలజీ మంత్రిత్వ శాఖ పరిధిలోని టెక్నాలజీ డెవలప్‌మెంట్ బోర్డ్ (TDB) ₹200 కోట్ల ఆర్థిక సహాయాన్ని ప్రకటించింది. పరిశోధన అభివృద్ధి మరియు ఆవిష్కరణల (RDI) నిధి కింద ఆప్షనల్లీ కన్వర్టిబుల్ డిబెంచర్ల ద్వారా ఈ నిధులను సమకూర్చడానికి ఒప్పందం కుదుర్చుకున్నారు. స్వదేశీ సాంకేతికతతో మళ్లీ మళ్లీ ఉపయోగించే అగ్నిబాణ్ లాంచ్ వెహికల్ అభివృద్ధిని వేగవంతం చేయడమే ఈ ప్రాజెక్ట్ ప్రధాన లక్ష్యం.

సాధారణంగా అంతరిక్ష ప్రయోగాల్లో ఉపయోగించే రాకెట్ల మొదటి దశను మాత్రమే తిరిగి పొందే విధానం అందుబాటులో ఉంది. అయితే ఈ ప్రాజెక్ట్ ద్వారా పూర్తిస్థాయిలో పునర్వినియోగానికి అనుకూలమైన అంతరిక్ష రవాణా వ్యవస్థను రూపొందించాలని నిర్దేశించుకున్నారు. ఇది రాకెట్ తయారీ మరియు ప్రయోగ వ్యయాన్ని గణనీయంగా తగ్గించడమే కాకుండా, అంతరిక్షంలో మిగిలిపోయే వ్యర్థాలను (Space Debris) నివారించడానికి ఎంతో తోడ్పడుతుంది. తేలికపాటి అప్పర్ స్టేజ్, కచ్చితమైన ఆర్బిటల్ ఇన్సర్షన్ సామర్థ్యాలు, సెమీ క్రియోజెనిక్ లిక్విడ్ ప్రొపల్షన్ సిస్టమ్ వంటి అత్యధునాతన సాంకేతికతల సమ్మేళనంతో అగ్నిబాణ్ ఆర్ఎల్వి రాకెట్ రూపొందుతోంది.

ఈ సందర్భంగా టీడీబీ కార్యదర్శి రాజేష్ కుమార్ పాఠక్ మాట్లాడుతూ, భవిష్యత్ అంతరిక్ష అవసరాలకు అనుగుణంగా వేగవంతమైన, సమర్థవంతమైన ప్రయోగ వ్యవస్థలు ఎంతో అవసరమని పేర్కొన్నారు. పునర్వినియోగ సాంకేతికత రంగాన్ని బలోపేతం చేయడంలో ఆర్‌డీఐ ఫండ్ ద్వారా అందిస్తున్న ఆర్థిక ప్రోత్సాహం ఎంతగానో దోహదపడుతుందన్నారు. కాగా, ప్రభుత్వం స్వదేశీ ప్రైవేట్ సాంకేతిక రంగానికి అందిస్తున్న ఈ మద్దతు పట్ల అగ్నికుల్ కాస్మోస్ నిర్వాహకులు హర్షం వ్యక్తం చేశారు. రాబోయే రోజుల్లో భారత అంతరిక్ష రంగంలో సులభమైన, చౌకైన ప్రయోగ సేవలను అందించడానికి ఈ సాంకేతికత మైలురాయిగా నిలవనుందని నిపుణులు ఆశాభావం వ్యక్తం చేస్తున్నారు.