కోయంబత్తూరులో సీఎం విజయ్: విమానాశ్రయం నుంచి గాంధీపురం వరకు భారీ రోడ్‌షోకు ఏర్పాట్లు!
సూర్య ప్రాంతీయ డెస్క్: తమిళనాడు ముఖ్యమంత్రి సి. జోసెఫ్ విజయ్ (TVK అధినేత) కోయంబత్తూరు నగరంలో ఒకరోజు పర్యటనకు విచ్చేస్తున్నారు. గాంధీపురంలో సుమారు ₹300 కోట్ల అంచనా వ్యయంతో నిర్మించిన ప్రతిష్టాత్మక 'పెరియార్ అరివులగం' (పెరియార్ నాలెడ్జ్ & సైన్స్ సెంటర్) ను సీఎం విజయ్ లాంఛనంగా ప్రారంభించనున్నారు. ముఖ్యమంత్రి పర్యటన సందర్భంగా కొవై విమానాశ్రయం నుంచి సభా ప్రాంగణం వరకు అభిమానులు, పార్టీ శ్రేణులు భారీ రోడ్‌షో, ఘన స్వాగత ఏర్పాట్లను సిద్ధం చేయడంతో నగరంలో పండుగ వాతావరణం నెలకొంది.
పెరియార్ సైన్స్ & నాలెడ్జ్ సెంటర్ విశేషాలు:
గాంధీపురం సెంట్రల్ బస్ స్టాండ్ సమీపంలోని జైలు శాఖకు చెందిన సుమారు ఏడెకరాల స్థలంలో బహుళ అంతస్తులతో ఈ అత్యాధునిక నాలెడ్జ్ సెంటర్‌ను నిర్మించారు. ఇందులో లక్షకు పైగా పుస్తకాలతో కూడిన సెంట్రల్ లైబ్రరీ, చిల్డ్రన్స్ లైబ్రరీ, డిజిటల్ రీడింగ్ జోన్లు, పరిశోధనా విభాగాలతో పాటు ఆధునిక సైన్స్ సెంటర్‌ను ఏర్పాటు చేశారు. ప్రారంభోత్సవంలో భాగంగా సీఎం విజయ్ తండై పెరియార్ కాంస్య విగ్రహాన్ని మరియు శిలాఫలకాన్ని ఆవిష్కరించి, సముదాయంలోని వివిధ విభాగాలను పరిశీలించనున్నారు. అనంతరం నగర పరిధిలో పూర్తయిన పలు మౌలిక వసతుల పనులను ప్రారంభించి, లబ్ధిదారులకు సంక్షేమ పథకాల సహాయాన్ని అందజేయనున్నారు.
విమానాశ్రయం నుంచి గాంధీపురం వరకు భారీ రోడ్‌షో – 3,500 మందితో భద్రత:
సీఎం విజయ్ రాక నేపథ్యంలో ఆయనకు స్వాగతం పలికేందుకు కొయంబత్తూరు విమానాశ్రయం నుంచి అవినాశి రోడ్, పీలమేడు, రెడ్ ఫీల్డ్స్ మీదుగా గాంధీపురం చేరుకునే మార్గంలో రోడ్‌షో తరహాలో భారీ ర్యాలీ నిర్వహించేందుకు ఏర్పాట్లు చేశారు. రోడ్డుకిరువైపులా భారీ ఎత్తున బారికేడ్లు ఏర్పాటు చేయడంతో పాటు నగరవ్యాప్తంగా దాదాపు 3,500 మందికి పైగా పోలీసు సిబ్బందితో కట్టుదిట్టమైన బందోబస్తును మోహరించారు. ఈ అధికారిక కార్యక్రమం ముగిసిన అనంతరం ముఖ్యమంత్రి విజయ్ ఆర్మ్‌డ్ రిజర్వ్ పోలీస్ గ్రౌండ్స్ నుంచి ప్రత్యేక హెలికాప్టర్ ద్వారా కేరళలోని త్రిస్సూర్‌కు బయలుదేరి వెళ్లనున్నారు.
