జోలార్‌పేట జంక్షన్‌లో పెను ప్రమాదం ముప్పు తప్పింది.. ఇంజిన్ లేకుండానే 6 కి.మీ దూసుకెళ్లి పట్టాలు తప్పిన ఏడు ఖాళీ రైలు బోగీలు!
సూర్య నేషనల్ బ్యూరో, చెన్నై:తమిళనాడులోని తిరుపత్తూరు జిల్లా జోలార్‌పేట రైల్వే జంక్షన్‌లో తీవ్ర కలకలం రేగింది. రైల్వే యార్డులో నిలిపి ఉంచిన ఏడు ఖాళీ రైలు బోగీలు ఇంజిన్ లేకుండానే వాటంతట అవే ట్రాక్‌పై కదిలి, దాదాపు 6 కిలోమీటర్ల దూరం వేగంగా దూసుకెళ్లిన ఘటన కలకలం సృష్టించింది. అనంతరం తామలేరి పరిసరాల్లోని ప్రధాన రైల్వే ట్రాక్‌పై ఇవి పట్టాలు తప్పడంతో పెను ప్రమాదం తప్పినట్లయింది. ఖాళీ బోగీలు కావడంతో పాటు ఆ సమయంలో ఎదురుగా ఎలాంటి ప్రయాణికుల రైళ్లు రాకపోవడంతో పెను విషాదం తప్పిందని రైల్వే అధికారులు ఊపిరి పీల్చుకున్నారు.
స్థానిక సమాచారం ప్రకారం.. జోలార్‌పేట జంక్షన్ యార్డులోని సైడింగ్ లైన్‌లో ఈ ఏడు బోగీలను నిలిపి ఉంచారు. అయితే సాంకేతిక లోపం లేదా హ్యాండ్‌బ్రేకులు సరిగ్గా వేయకపోవడం, ట్రాక్ వాలు (Slope) కారణంగా ఈ బోగీలు ఆకస్మికంగా కదలడం ప్రారంభించాయి. వేగం పుంజుకుంటూ ప్రధాన లైన్ వైపు దాదాపు ఆరు కిలోమీటర్ల మేర దూసుకెళ్లడంతో స్టేషన్ సిబ్బంది, ట్రాక్‌మెన్లు తీవ్ర భయాందోళనలకు గురయ్యారు. చివరకు తామలేరి సమీపంలో బోగీలు పట్టాలు తప్పి ఆగిపోయాయి.
ఈ ఘటనతో చెన్నై-బెంగళూరు ప్రధాన మార్గంలో రైళ్ల రాకపోకలకు స్వల్ప అంతరాయం ఏర్పడింది. సమాచారం అందుకున్న వెంటనే రైల్వే సేఫ్టీ అధికారులు, సాంకేతిక బృందాలు ఘటనా స్థలానికి చేరుకుని ట్రాక్‌ను పునరుద్ధరించే పనులను యుద్ధప్రాతిపదికన చేపట్టాయి. యార్డులో నిలిపి ఉంచిన కోచ్‌ల చక్రాలకు సేఫ్టీ క్లాంప్‌లు ఎందుకు వేయలేదు? ఇది సిబ్బంది నిర్లక్ష్యమా లేక బ్రేకింగ్ వ్యవస్థ వైఫల్యమా అనే కోణంలో ఉన్నత స్థాయి దర్యాప్తునకు రైల్వే శాఖ ఆదేశించింది.
