ది లలిత్‌లో నెస్లే డెయిరీ వైటెనర్ నమూనా 'అసురక్షితం
ఉత్పత్తి అమ్మకాలు తక్షణం ఆపాలని ఎఫ్ఎస్ఎస్ఏఐ ఆదేశం, అప్పీలుకు అవకాశం
సూర్య జాతీయ డెస్క్: ఢిల్లీలోని కన్నాట్ ప్లేస్‌లో ఉన్న ది లలిత్ హోటల్ నుంచి సేకరించిన నెస్లే ఇండియా "లో ఫ్యాట్ డెయిరీ వైటెనర్" నమూనా అసురక్షితమైనది, నాణ్యతా ప్రమాణాలకు తగనిదని ప్రయోగశాల పరీక్షలో తేలినట్లు భారత ఆహార భద్రత, ప్రమాణాల సంస్థ (ఎఫ్ఎస్ఎస్ఏఐ) వెల్లడించింది. ఈ విషయాన్ని సంస్థ శనివారం సామాజిక మాధ్యమం ఎక్స్‌లో ప్రకటించింది. ఈ ఉత్పత్తి అమ్మకాలపై తక్షణ చర్యలకు ఆదేశించింది.
ఫుడ్ అనలిస్ట్ ప్రయోగశాల నివేదిక ప్రకారం, ఈ ఉత్పత్తి ఆహార భద్రత, ప్రమాణాల చట్టం 2006లోని నిబంధనలకు అనుగుణంగా లేదని ఎఫ్ఎస్ఎస్ఏఐ తెలిపింది. దీనిపై హోటల్‌ను నిర్వహించే భారత్ హోటల్స్ లిమిటెడ్‌కు నోటీసు జారీ చేశారు. ప్రయోగశాల నివేదిక ప్రతిని కూడా సంబంధిత ఆహార వ్యాపార నిర్వాహకులకు అందజేశారు. తదుపరి చర్యలు తేలే వరకు ఆ ఉత్పత్తిని అమ్మకూడదని సంస్థ ఆదేశించింది.
ఫుడ్ అనలిస్ట్ నివేదికను సవాలు చేసేందుకు, నిర్ణీత గడువులోగా అప్పీలు దాఖలు చేసేందుకు ఆహార భద్రతా చట్టం ప్రకారం హోటల్ నిర్వాహకులకు అవకాశం ఇచ్చినట్లు ఎఫ్ఎస్ఎస్ఏఐ తెలిపింది. ఇంతవరకు ఎఫ్ఎస్ఎస్ఏఐ ప్రకటనలో ఏ ప్రయోగశాల పరామితి కారణంగా నమూనాను అసురక్షితమైనదిగా ప్రకటించారో వెల్లడించలేదు.
ఈ చర్య కేవలం ది లలిత్ నుంచి తీసిన నమూనాకు సంబంధించినదని, దేశవ్యాప్తంగా లభించే ప్రతి ప్యాకెట్ అసురక్షితమని ఎఫ్ఎస్ఎస్ఏఐ ఇంకా ప్రకటించలేదని గమనించాలి. ఆహార నాణ్యత, నిబంధనల అమలుపై ఎఫ్ఎస్ఎస్ఏఐ పర్యవేక్షణ తీవ్రతరం చేసిన నేపథ్యంలో ఈ పరిణామం చోటుచేసుకుంది.
