హైబ్రిడ్ ఎస్‌యూవీ.. ఏకంగా 1770 కిలోమీటర్ల భారీ రేంజ్..
ఆటోమొబైల్ మార్కెట్లోకి పవర్ ఫుల్ ఆఫ్ రోడ్ హైబ్రిడ్ ఎస్‌యూవీ
సూర్య బిజినెస్ డెస్క్: గ్లోబల్ ఆటోమొబైల్ రంగంలో ఎలక్ట్రిక్, హైబ్రిడ్ వాహనాల పోటీ రోజురోజుకూ సరికొత్త పుంతలు తొక్కుతోంది. వినియోగదారులను ఎంతగానో వేధించే ఛార్జింగ్, రేంజ్ ఆందోళనలకు శాశ్వత పరిష్కారం చూపే దిశగా ప్రముఖ ఆటోమొబైల్ దిగ్గజం గీలీ గ్రూప్ సంచలన వాహనాన్ని సిద్ధం చేసింది. గీలీ గెలాక్సీ బ్రాండ్ కింద 'బ్యాటిల్‌షిప్ 700' పేరుతో పూర్తిస్థాయి ప్లగ్ ఇన్ హైబ్రిడ్ ఆఫ్ రోడ్ ఎస్‌యూవీని మార్కెట్లోకి తీసుకొస్తోంది. ఒక్కసారి ఫుల్ ట్యాంక్ ఇంధనం, పూర్తి బ్యాటరీ ఛార్జింగ్‌తో ఏకంగా 1,770 కిలోమీటర్ల మేర ప్రయాణించగల అసాధారణ డ్రైవింగ్ రేంజ్ ఈ కారు సొంతం కావడం మార్కెట్లో హాట్ టాపిక్‌‌గా మారింది.
ఈ భారీ ఎస్‌‌యూవీలో అత్యాధునిక థోర్ ఈఎమ్-టీ ప్లగ్ ఇన్ హైబ్రిడ్ పవర్‌ట్రెయిన్ టెక్నాలజీని అమర్చారు. టర్బో పెట్రోల్ ఇంజిన్‌తో పాటు శక్తివంతమైన ట్రిపుల్ ఎలక్ట్రిక్ మోటార్లు మరియు ఆల్ వీల్ డ్రైవ్ సెటప్‌తో ఇది పనిచేస్తుంది. ఈ వాహనం గరిష్టంగా 1,113 హార్స్ పవర్ శక్తిని, 1,330 న్యూటన్ మీటర్ల టార్క్‌ను ఉత్పత్తి చేస్తుంది. ఇంత భారీ బాడీ సైజు ఉన్నప్పటికీ కేవలం 3.95 సెకన్లలోనే సున్నా నుంచి వంద కిలోమీటర్ల వేగాన్ని అందుకోవడం స్పోర్ట్స్ కార్లకు సైతం గట్టి పోటీనిచ్చేలా ఉందని ఆటో నిపుణులు విశ్లేషిస్తున్నారు.
ఈ వాహనంలో ప్రముఖ బ్యాటరీ తయారీ సంస్థ సీఏటీఎల్ రూపొందించిన 47.14 కిలోవాట్ అవర్ సామర్థ్యం కలిగిన ప్రత్యేక ఎల్‌ఎఫ్‌పీ బ్యాటరీని పొందుపరిచారు. ఎలాంటి పెట్రోల్ వాడకుండా ప్యూర్ ఎలక్ట్రిక్ మోడ్‌లోనే రోజువారీ సిటీ ప్రయాణాల కోసం సుమారు 305 కిలోమీటర్ల దూరం నిరాటంకంగా ప్రయాణించవచ్చు. సుదూర ప్రయాణాలు చేసే సమయంలో హైబ్రిడ్ మోడ్ ఆన్ కావడంతో మొత్తం రేంజ్ 1,770 కిలోమీటర్లకు చేరుకుంటుంది. దీనివల్ల తరచూ ఫ్యూయల్ స్టేషన్లకు వెళ్లాల్సిన లేదా ఛార్జింగ్ పాయింట్ల వద్ద నిరీక్షించాల్సిన అవసరం వాహనదారులకు పూర్తిగా తప్పుతుంది.
ఆధునిక డిజైన్, ఐదు మీటర్లకు పైగా పొడవుతో దృఢమైన బాక్సీ లుక్‌లో ఉన్న ఈ ఎస్‌యూవీ కఠినమైన కొండ ప్రాంతాలు, రాతి దారుల్లోనూ అలవోకగా దూసుకుపోయేలా ఆఫ్ రోడింగ్ ఫీచర్లను కలిగి ఉంది. కారు పైకప్పుపై అత్యాధునిక లైడార్ సెన్సార్లతో కూడిన లెవల్ 2 ప్లస్ అడాస్ రక్షణ వ్యవస్థ, యాక్టివ్ హైడ్రాలిక్ సస్పెన్షన్, ప్రత్యేకమైన క్రాబ్ వాక్ టెక్నాలజీలను జోడించారు. ప్రీ-సేల్స్ ప్రారంభమైన తొలి గంటలోనే నలభై వేలకు పైగా బుకింగ్‌లు సాధించిన ఈ పవర్‌హౌస్ ఎస్‌యూవీ రాకతో గ్లోబల్ మార్కెట్లో సంప్రదాయ లగ్జరీ ఆఫ్ రోడర్లకు గట్టి పోటీ తప్పదని స్పష్టమవుతోంది.
