రూఫ్టాప్ సోలార్ కోసం 'ఢిల్లీ పీఎం సూర్య ఘర్' పోర్టల్ను ప్రారంభించిన సీఎం రేఖా గుప్తా
సూర్య జాతీయ డెస్క్: దేశ రాజధాని ఢిల్లీ వ్యాప్తంగా గృహ వినియోగదారులకు సౌర విద్యుత్ను సులభంగా అందుబాటులోకి తీసుకురావాలనే లక్ష్యంతో ముఖ్యమంత్రి రేఖా గుప్తా సోమవారం 'ఢిల్లీ పీఎం సూర్య ఘర్' రిజిస్ట్రేషన్ పోర్టల్ను ప్రారంభించారు. ప్రధానమంత్రి సూర్య ఘర్: ముఫ్ట్ బిజిలీ యోజన కింద రూపొందించిన ఈ డిజిటల్ వేదిక ద్వారా నివాసితులు రూఫ్టాప్ సోలార్ సిస్టమ్ల ఏర్పాటు కోసం నేరుగా దరఖాస్తు చేసుకోవచ్చు. సబ్సిడీల వివరాలు, అధీకృత విక్రేతల జాబితా మరియు సమస్యల పరిష్కారానికి సంబంధించిన సమాచారాన్ని కూడా పోర్టల్లో అందుబాటులో ఉంచారు. ముందుగా దరఖాస్తు చేసుకున్న వారికి ప్రాధాన్యతా క్రమంలో ప్రాసెస్ చేయనున్నట్లు ప్రభుత్వం స్పష్టం చేసింది.
ఈ పథకం కింద 3 కిలోవాట్ల వరకు ఉండే నివాస రూఫ్టాప్ సోలార్ సిస్టమ్లకు కేంద్ర ప్రభుత్వం ₹78,000 వరకు సబ్సిడీని అందిస్తుండగా, ఢిల్లీ ప్రభుత్వం అదనంగా రాష్ట్ర రాయితీని ప్రకటించింది. దీంతో అర్హతగల వినియోగదారులకు లభించే మొత్తం ఆర్థిక సహాయం రూ.1.56 లక్షల వరకు పెరిగింది. పరిమిత పైకప్పు స్థలం ఉన్న గృహాల కోసం 2 కిలోవాట్ల వరకు సోలార్ వ్యవస్థలను ప్రభుత్వం ప్రోత్సహిస్తోంది. స్థలం లేదా ఆర్థిక పరిమితులు ఉన్నవారికి గ్రూప్ నెట్ మీటరింగ్, కమ్యూనిటీ సోలార్ మోడళ్లను పోర్టల్ ద్వారా అందిస్తున్నారు. ఈ పథకాన్ని ఎంచుకునే వినియోగదారులకు ఐదేళ్ల పాటు సిస్టమ్ల నిర్వహణ, పర్యవేక్షణ బాధ్యతలను ఎంప్యానెల్ చేసిన విక్రేతలే చూసుకుంటారు.
ఢిల్లీ వ్యాప్తంగా సుమారు 2.30 లక్షల కుటుంబాలకు రూఫ్టాప్ సోలార్ సిస్టమ్లను అందించాలని లక్ష్యంగా పెట్టుకున్నట్లు ప్రభుత్వం వెల్లడించింది. ఈ చొరవ ఢిల్లీని సోలార్ క్యాపిటల్గా మార్చడానికి దోహదపడుతుందని, గృహాలకు విద్యుత్ ఖర్చులు తగ్గడమే కాకుండా మిగులు సౌర విద్యుత్ ఉత్పత్తి ద్వారా ఆదాయం కూడా లభిస్తుందని విద్యుత్ మంత్రి ఆశిష్ సూద్ తెలిపారు. వినియోగదారులు తమ విద్యుత్ వాడకం, పైకప్పు వైశాల్యం ఆధారంగా సోలార్ సిస్టమ్ సామర్థ్యం, ఇన్స్టాలేషన్ ఖర్చు, సబ్సిడీలు మరియు పొదుపును ముందే అంచనా వేసుకోవడానికి పోర్టల్లో ప్రత్యేకంగా 'రూఫ్టాప్ సోలార్ కాలిక్యులేటర్' సదుపాయాన్ని కల్పించారు.
