షేక్ అహ్మద్ బిన్ రషీద్ అల్ మక్తూమ్ మృతి పట్ల ప్రధాని మోదీ సంతాపం

సూర్య అంతర్జాతీయ డెస్క్: దుబాయ్ పాలకుడు, యూఏఈ ఉపాధ్యక్షుడు మరియు ప్రధానమంత్రి షేక్ మహమ్మద్ బిన్ రషీద్ అల్ మక్తూమ్ సోదరుడు షేక్ అహ్మద్ బిన్ రషీద్ అల్ మక్తూమ్ (76) సోమవారం ఉదయం కన్నుమూశారు. ఆయన మృతి పట్ల భారత ప్రధాని నరేంద్ర మోదీ తీవ్ర దిగ్భ్రాంతిని, విచారాన్ని వ్యక్తం చేశారు. సామాజిక మాధ్యమం ఎక్స్ వేదికగా స్పందించిన ప్రధాని మోదీ, షేక్ అహ్మద్ సమాజ సేవకు అందించిన విశేష సేవలను రాబోయే తరాలు ఎప్పటికీ గుర్తుంచుకుంటాయని కొనియాడారు. రాజకుటుంబ సభ్యులకు, దుబాయ్ ప్రజలకు తన హృదయపూర్వక సానుభూతిని తెలియజేస్తూ, దివంగత ఆత్మకు శాశ్వత శాంతి చేకూరాలని కోరారు.

షేక్ అహ్మద్ బిన్ రషీద్ అల్ మక్తూమ్ పరమపదించడంతో దుబాయ్ ప్రభుత్వ మీడియా కార్యాలయం ఎమిరేట్ వ్యాప్తంగా 10 రోజుల పాటు అధికారిక సంతాప దినాలను ప్రకటించింది. ఈ సంతాప దినాల సందర్భంగా జాతీయ జెండాలను సగం వరకు అవనతం చేయనున్నట్లు వెల్లడించింది. తన సోదరుడి మరణం పట్ల షేక్ మహమ్మద్ బిన్ రషీద్ అల్ మక్తూమ్ తీవ్ర ఆవేదన వ్యక్తం చేస్తూ నివాళులర్పించారు. దేశంలో ఉన్నతాధికారులు, వివిధ రంగాల ప్రముఖులు మరియు అంతర్జాతీయ నాయకులు అల్ మక్తూమ్ కుటుంబానికి తమ సానుభూతిని తెలియజేశారు.

దివంగత షేక్ రషీద్ బిన్ సయీద్ అల్ మక్తూమ్ నాల్గవ, చిన్న కుమారుడైన షేక్ అహ్మద్ యునైటెడ్ కింగ్‌డమ్‌లోని ప్రసిద్ధ రాయల్ మిలిటరీ అకాడమీ శాండ్‌హర్స్ట్ నుండి పట్టభద్రులయ్యారు. అనంతరం దుబాయ్ సెంట్రల్ మిలిటరీ రీజియన్‌లో చేరి కమాండర్-ఇన్-చీఫ్‌గా బాధ్యతలు నిర్వర్తించారు. భద్రత, వ్యాపార, క్రీడా రంగాలలో ఉన్నత పదవులు చేపట్టిన ఆయన దుబాయ్ పోలీస్ అండ్ పబ్లిక్ సెక్యూరిటీ డిప్యూటీ ఛైర్మన్‌గా, ఏ.ఆర్.ఎం. హోల్డింగ్ గ్రూప్ ఛైర్మన్‌గా, అల్ వాస్ల్ స్పోర్ట్స్ క్లబ్ అధ్యక్షుడిగా సేవలందించారు. అంతేకాకుండా 1990వ దశకం ప్రారంభంలో జెబెల్ అలీ రేస్‌కోర్స్‌ను స్థాపించి యూఏఈలో గుర్రపు పందాల క్రీడను అంతర్జాతీయ స్థాయిలో ప్రోత్సహించడంలో కీలక పాత్ర పోషించారు.