బంగాళాఖాతంలో అల్పపీడనం: ఏపీ, తమిళనాడు వైపు పయనం!

బంగాళాఖాతంలో వాతావరణ మార్పులు వేగంగా చోటుచేసుకుంటున్నాయి. ప్రస్తుతం ఉత్తర అండమాన్ సముద్రంలో ఉపరితల ఆవర్తనం కొనసాగుతోంది. దీని ప్రభావంతో రాగల మంగళవారం నాటికి ఆగ్నేయ బంగాళాఖాతంలో అల్పపీడనం ఏర్పడే అవకాశం ఉందని వాతావరణ శాఖ వెల్లడించింది. ఇది ఏర్పడిన తర్వాత 3 నుంచి 4 రోజుల్లో మరింత బలపడి, బుధవారానికి వాయుగుండంగా మారే అవకాశం ఉందని అధికారులు అంచనా వేస్తున్నారు. అనంతరం ఇది ఉత్తర తమిళనాడు మరియు దక్షిణ కోస్తాంధ్ర తీరాల వైపు పయనించే సూచనలు ఉన్నాయని, దీనివల్ల ఆయా ప్రాంతాల్లో భారీ వర్షాలు కురిసే అవకాశం ఉందని హెచ్చరించారు. తీరప్రాంత ప్రజలు, మత్స్యకారులు అప్రమత్తంగా ఉండాలని సూచించారు.