బిహార్లో రూ.34,470 కోట్ల అభివృద్ధి ప్రాజెక్టులు ప్రారంభించనున్న ప్రధాని మోదీ
సూర్య జాతీయ డెస్క్: ప్రధానమంత్రి నరేంద్ర మోదీ శనివారం బిహార్లోని వైశాలి జిల్లాలో పర్యటించి సుమారు రూ.34,470 కోట్ల విలువైన అభివృద్ధి ప్రాజెక్టులను ప్రారంభించడంతో పాటు పలు పనులకు శంకుస్థాపన చేయనున్నారు. గంగా నదిపై నిర్మించిన 19.7 కిలోమీటర్ల ఆరు లేన్ల ఎక్స్ట్రాడోజ్డ్ కేబుల్-స్టేడ్ వంతెన నితీశ్ సేతును ఈ సందర్భంగా ప్రధాని జాతికి అంకితం చేయనున్నారు. సుమారు రూ.4,280 కోట్ల అంచనా వ్యయంతో నిర్మించిన ఈ వంతెన పాట్నా జిల్లాలోని కచ్చి దర్గా (ఎన్హెచ్-22)ను వైశాలి జిల్లాలోని బిదుపూర్ (ఎన్హెచ్-322)తో కలుపుతూ ఉత్తర, దక్షిణ బిహార్ మధ్య రవాణా అనుసంధానాన్ని బలోపేతం చేస్తుంది. ఇందులో 9.7 కిలోమీటర్ల ప్రధాన వంతెనతో పాటు 10 కిలోమీటర్ల అప్రోచ్ రోడ్లు ఉన్నాయి.
ఈ పర్యటనలో భాగంగా రూ.15,600 కోట్లకు పైగా విలువైన మౌలిక సదుపాయాలు మరియు అభివృద్ధి ప్రాజెక్టులను ప్రధాని మోదీ ప్రారంభించనున్నారు. రహదారి రంగంలో ఎన్హెచ్-19లోని ఔరంగాబాద్-చోర్దాహా సెక్షన్ ఆరు లేన్ల విస్తరణ, ఎన్హెచ్-227ఎఫ్లోని చోర్మా-బైర్గానియా సెక్షన్, ఎన్హెచ్-327లోని ఉమాగావ్-సహర్సా సెక్షన్ వంటి కీలక ప్రాజెక్టులు వీటిలో ఉన్నాయి. అలాగే రూ.1,130 కోట్లకు పైగా విలువైన ఆర్డీఎస్ఎస్ నష్ట నివారణ పనులు, కాలువలు మరియు కట్టల పునరుద్ధరణ, బలోపేతం, నవాడాలోని ఫుల్వారియా డ్యామ్ వద్ద ఫ్లోటింగ్ సోలార్ ప్రాజెక్టు, కహల్గావ్ మురుగునీటి మౌలిక సదుపాయాలతో పాటు విద్యాసంస్థలు, రెసిడెన్షియల్ పాఠశాలలు, ఆరోగ్య సేవలు, వ్యవసాయం, క్రీడలు మరియు ప్రజా పరిపాలన భవనాలను ప్రధాని ప్రారంభించనున్నారు.
మరోవైపు సుమారు రూ.14,450 కోట్ల విలువైన ప్రాజెక్టులకు ప్రధానమంత్రి శంకుస్థాపన చేయనున్నారు. వీటిలో రూ.3,800 కోట్లకు పైగా వ్యయంతో చేపట్టనున్న ఎన్హెచ్-139డబ్ల్యూలోని సాహెబ్గంజ్-అరెరాజ్-బెట్టియా సెక్షన్ నాలుగు లేన్ల విస్తరణ మరియు సుమారు రూ.3,350 కోట్ల అంచనా వ్యయంతో నిర్మించే పిర్పైంటి సూపర్ థర్మల్ పవర్ ప్రాజెక్టు (3x800 మెగావాట్లు) పవర్ ఎవాక్యుయేషన్ ప్రాజెక్టు ప్రధానమైనవి. వీటితో పాటు బేగుసరాయ్, బిహార్షరీఫ్, పూర్ణియా, హాజీపూర్, మోతీహరి, దానాపూర్, ఖగారియా, సమస్తిపూర్, బోధ్ గయ, సీతామర్హి, సహర్సా వంటి పట్టణ ప్రాంతాల్లో మురుగునీరు, తాగునీటి సరఫరా పథకాలు, కాలువల ఆధునికీకరణ, డాక్టర్ భీమ్రావ్ అంబేడ్కర్ రెసిడెన్షియల్ పాఠశాలలు, ఐఐటీ పాట్నా రీసెర్చ్ పార్క్ మరియు హాస్టల్, ఇంజినీరింగ్, పాలిటెక్నిక్ సంస్థలు, అత్యవసర స్పందన మరియు పోలీస్ డేటా సెంటర్ మౌలిక సదుపాయాలకు శంకుస్థాపనలు జరగనున్నాయి.
పర్యావరణ హిత ప్రజా రవాణాను ప్రోత్సహించే దిశగా బిహార్లో 100 పీఎం-ఈబస్సులను కూడా ప్రధాని మోదీ జెండా ఊపి ప్రారంభించనున్నారు. అలాగే ప్రధానమంత్రి ఆవాస్ యోజన (అర్బన్) కింద 26,900 మందికి పైగా లబ్ధిదారుల గృహ ప్రవేశ వేడుకలు కూడా ఈ కార్యక్రమంలో భాగంగా నిర్వహించనున్నారు. రహదారులు, వంతెనలు, విద్యుత్, ప్రజా రవాణా, గృహనిర్మాణం, నీటి సరఫరా మరియు విద్యా రంగాలను కలుపుతూ చేపట్టిన ఈ భారీ ప్యాకేజీ బిహార్ సమగ్రాభివృద్ధికి కొత్త ఊపునిస్తుందని అధికారులు తెలిపారు.