విమానంలో పవర్ బ్యాంక్ పేలుడు కలకలం
సూర్య అంతర్జాతీయ డెస్క్: డచ్ విమానయాన సంస్థ కేఎల్‌ఎం (KLM) సంస్థకు చెందిన విమానంలో ప్రయాణిస్తున్న సమయంలో పవర్ బ్యాంక్ పేలి మంటలు చెలరేగిన ఘటనలో కీలక పరిణామం చోటుచేసుకుంది. ఈ ఘటనకు కారణమైన ఆ సంస్థ మాజీ చీఫ్ ఎగ్జిక్యూటివ్ ఆఫీసర్ (సీఈఓ) కామెయిల్ యూర్‌లింగ్స్‌పై కేఎల్‌ఎం మేనేజ్‌మెంట్ పోలీసులకు అధికారికంగా ఫిర్యాదు చేసింది. విమాన ప్రయాణ భద్రతా నిబంధనలను ఉల్లంఘించి, గాలిలో ఉండగా పవర్ బ్యాంక్‌ను ఛార్జింగ్ పెట్టడం వల్లే ఈ ప్రమాదం జరిగిందని విచారణలో తేలడంతో ఎయిర్‌లైన్స్ ఈ కఠిన నిర్ణయం తీసుకుంది.
ఆమ్నేస్టర్ డామ్ నుంచి కురాకో వెళ్తున్న కేఎల్‌ఎం విమానం (కేఎల్735) ప్రయాణిస్తున్న సమయంలో బిజినెస్ క్లాస్ క్యాబిన్‌లో ఉన్న మాజీ సీఈఓ పవర్ బ్యాంక్ అకస్మాత్తుగా పేలి మంటలు వ్యాపించాయి. ఈ ప్రమాదంలో విమాన కిటికీ దెబ్బతినడంతో పాటు ఒక ప్రయాణికుడికి స్వల్ప గాయాలయ్యాయి. అప్రమత్తమైన సిబ్బంది వెంటనే మంటలను ఆర్పివేయడంతో పెను ప్రమాదం తప్పింది. అయితే భద్రతా కారణాల దృష్ట్యా విమానాన్ని తిరిగి బయలుదేరిన ఎయిర్‌పోర్టుకు మళ్లించాల్సి వచ్చింది. ఈ ఘటన వల్ల సుమారు 322 మంది ప్రయాణికులు తీవ్ర అసౌకర్యానికి గురయ్యారు.
విమానాలలో పవర్ బ్యాంక్‌లను వాడటం, ముఖ్యంగా వాటిని ఛార్జ్ చేయడంపై కఠినమైన నిషేధాలు ఉన్నప్పటికీ మాజీ సీఈఓ ఈ నిబంధనలను బేఖాతరు చేశారని అంతర్గత విచారణలో వెల్లడైంది. ప్రయాణ భద్రతకు భంగం కలిగించినందుకు గాను ఆయనపై తగిన చట్టపరమైన చర్యలు తీసుకోవాలని కోరుతూ కేఎల్‌ఎం యాజమాన్యం పోలీసులకు ఫిర్యాదు అందజేసింది. మరోవైపు ఈ ఘటనపై డచ్ సేఫ్టీ బోర్డ్ (OVV) కూడా ప్రత్యేకంగా దర్యాప్తునకు ఆదేశించింది. ఈ పరిణామం అంతర్జాతీయ విమానయాన రంగంలో తీవ్ర చర్చనీయాంశమైంది.
