వాతావరణ మార్పుల పోరాటానికి విదేశీ రెమిటెన్స్ అస్త్రం
సూర్య అంతర్జాతీయ డెస్క్: వాతావరణ మార్పుల వల్ల తీవ్ర ముప్పు ఎదుర్కొంటున్న చిన్న ద్వీప దేశాలు (స్మాల్ ఐలాండ్ డెవలపింగ్ స్టేట్స్ - సిడ్స్) తమ ఆర్థిక స్వావలంబన కోసం వినూత్న అస్త్రాన్ని ప్రయోగించేందుకు సిద్ధమయ్యాయి. విదేశాల్లో స్థిరపడిన తమ దేశస్తులు స్వదేశాలకు పంపే నగదు బదిలీలపై (రెమిటెన్స్) స్వల్ప రుసుము విధించడం ద్వారా ఏటా సుమారు 3 బిలియన్ డాలర్ల నిధిని సమీకరించాలని ఈ దేశాల కూటమి లక్ష్యంగా పెట్టుకుంది. టర్కీలోని అంటాల్య నగరంలో జరుగుతున్న కాప్-31 (COP31) వాతావరణ సదస్సు వేదికగా ఈ కీలక ప్రతిపాదన తెరపైకి వచ్చింది. అభివృద్ధి చెందిన దేశాల నుంచి వచ్చే ఆర్థిక సాయం కోసం ఏళ్ల తరబడి ఎదురుచూడటం కంటే, తమ సొంత వనరులతోనే వాతావరణ రక్షణ ప్రాజెక్టులను నిర్మించుకోవాలని ఈ ద్వీప దేశాలు నిర్ణయించుకున్నాయి.
గతంలో 2021-22 మధ్య కాలంలో అంతర్జాతీయ నిధుల రూపంలో ఈ దేశాలకు అందిన 2 బిలియన్ డాలర్ల సాయంతో పోలిస్తే, ఈ కొత్త విధానం ద్వారా అంతకంటే ఎక్కువ మొత్తాన్ని సేకరించవచ్చని క్లైమేట్ పాలసీ ఇనిషియేటివ్ అధ్యయనాలు స్పష్టం చేస్తున్నాయి. పసిఫిక్, కరేబియన్, అట్లాంటిక్ మరియు హిందూ మహాసముద్ర ప్రాంతాల్లోని ఈ ద్వీప దేశాలు సముద్ర మట్టాలు పెరగడం వల్ల ఉనికి కోల్పోయే ప్రమాదంలో ఉన్నాయి. ఇప్పటికే భారీ స్థాయిలో జాతీయ రుణభారంతో సతమతమవుతున్న ఈ దేశాలు, తీరప్రాంత కోతను అరికట్టే రక్షణ చర్యలపై పెట్టుబడులు పెట్టలేకపోతున్నాయి. ఈ నేపథ్యంలో విదేశీ నిధులపై ఆధారపడకుండా సొంత నిధిని ఏర్పాటు చేసుకోవాలని ఆంటిగ్వా అండ్ బార్బుడా ఐక్యరాజ్యసమితి రాయబారి వాల్టన్ వెబ్సన్ స్పష్టం చేశారు.
సిడ్స్ కూటమి గణాంకాల ప్రకారం, విదేశాలకు వలస వెళ్లిన ద్వీపవాసులు ఏటా సుమారు 22 బిలియన్ డాలర్లను తమ స్వదేశాలకు పంపుతున్నారు. ప్రస్తుతం వాణిజ్య సంస్థలు ఈ నగదు బదిలీలపై 5 నుండి 9 శాతం వరకు భారీగా కమీషన్లు వసూలు చేస్తుండగా, కొత్తగా ఏర్పాటు చేయబోయే సిడ్స్ ప్లాట్‌ఫారమ్ ద్వారా కేవలం 3 శాతం మాత్రమే రుసుము వసూలు చేయనున్నారు. దీనివల్ల విదేశాల్లో ఉన్న వారికి బదిలీ ఖర్చులు తగ్గడమే కాకుండా, ఆ రుసుములో 2 నుండి 2.5 శాతం మొత్తం శాశ్వత ఎండోమెంట్ నిధిలోకి చేరుతుంది. మొదటి దశలో డొమినికన్ రిపబ్లిక్, హైతీ, జమైకా, గయానా దేశాలలో, ఆ తర్వాత ఫిజీ, సమోవా, టోంగా, మారిషస్ వంటి దేశాలలో ఈ విధానాన్ని దశలవారీగా అమలు చేయనున్నారు.
ఈ నిధి ద్వారా సమకూరిన మొత్తాన్ని పెట్టుబడిగా పెట్టి, వచ్చే ఆదాయంలో 85 శాతాన్ని వాతావరణ అనుకూలత ప్రాజెక్టులకు, మిగిలిన 15 శాతాన్ని ప్రకృతి విపత్తుల అత్యవసర నిధిగా వినియోగించనున్నారు. పదో ఏడాది నాటికి ఈ నిధి సుమారు 2.59 బిలియన్ డాలర్లకు చేరుకుంటుందని, ఇతర గ్రాంట్లు మరియు పర్యాటక సుంకాలను కూడా జత చేస్తే 5.53 బిలియన్ డాలర్ల స్థాయికి విస్తరిస్తుందని అంచనా వేస్తున్నారు. వాతావరణ సంక్షోభానికి ఏమాత్రం కారణం కాని చిన్న ద్వీప దేశాలు, ఆ విపత్తులను ఎదుర్కోవడానికి అప్పులు చేయాల్సి రావడం అన్యాయమని పలావు అధ్యక్షుడు సురాంజెల్ విప్స్ జూనియర్ పేర్కొన్నారు. తమ దేశస్తులు పంపే సొమ్మును తమ దేశ రక్షణ కోసమే వినియోగించుకునే ఈ ప్రతిపాదన అంతర్జాతీయ వాతావరణ ఆర్థిక విధానాల్లో సరికొత్త మలుపు కానుంది.
