మాంటెనెగ్రోకు త్వరలో ఈయూ సభ్యత్వం

సూర్య జాతీయ డెస్క్: ఐరోపా సమాఖ్య (ఈయూ) విస్తరణ ప్రక్రియలో మరో కీలక పరిణామం చోటుచేసుకుంది. బాల్కన్ దేశమైన మాంటెనెగ్రో త్వరలోనే ఈయూలో పూర్తి స్థాయి సభ్యత్వం పొందే దిశగా అడుగులు వేస్తోంది. అంతా అనుకున్నట్లు జరిగితే 2027 జూన్ నాటికి మాంటెనెగ్రో ఈయూతో ప్రవేశ ఒప్పందంపై (యాక్సెషన్ ట్రీటీ) అధికారికంగా సంతకం చేసే అవకాశం ఉందని యూరోపియన్ కమిషన్ వెల్లడించింది. ఈ మేరకు ఆ దేశం సాధిస్తున్న ప్రగతిని, సంస్కరణలను ఈయూ వర్గాలు ప్రశంసించాయి.

మాంటెనెగ్రోలో ప్రజాస్వామ్య వ్యవస్థల బలోపేతం, చట్టబద్ధత అమలు మరియు అవినీతి నిరోధక చర్యల విషయంలో ఆ దేశ ప్రభుత్వం చూపుతున్న చొరవను యూరోపియన్ కమిషన్ ప్రత్యేకంగా కొనియాడింది. ఈయూ ప్రమాణాలకు అనుగుణంగా వివిధ రంగాల్లో చేపట్టిన సంస్కరణలు సత్ఫలితాలను ఇస్తున్నాయని పేర్కొంది. ఇదే వేగంతో సంస్కరణలను కొనసాగిస్తే నిర్ణీత గడువులోగా అన్ని ప్రక్రియలు పూర్తయి ఐరోపా సమాఖ్యలో మాంటెనెగ్రో చేరిక లాంఛనం కానుందని స్పష్టం చేసింది.

పశ్చిమ బాల్కన్ ప్రాంతంలో ఈయూలో చేరడానికి ప్రయత్నిస్తున్న దేశాల జాబితాలో మాంటెనెగ్రో ప్రస్తుతం అగ్రగామిగా ఉంది. గత కొంతకాలంగా ఆ దేశం ఈయూ విధివిధానాలకు కట్టుబడి ఆర్థిక, రాజకీయ రంగాల్లో పారదర్శకతను పెంపొందించేందుకు కఠినమైన చర్యలు చేపట్టింది. ఈయూ సభ్యత్వం లభిస్తే ఆ దేశ ఆర్థిక వ్యవస్థకు మరింత ఊతమివ్వడంతో పాటు ప్రాంతీయ భద్రత మరియు స్థిరత్వం మరింత బలపడతాయని దౌత్య నిపుణులు అంచనా వేస్తున్నారు.

ఐరోపా సమాఖ్యలో కొత్త సభ్య దేశాల చేరిక ద్వారా ప్రాంతీయ ఐక్యతను చాటాలని ఈయూ భావిస్తున్న తరుణంలో మాంటెనెగ్రో పరిణామం ప్రాధాన్యత సంతరించుకుంది. రాబోయే నెలల్లో మిగిలిన చట్టపరమైన, సాంకేతిక అంశాలను కూడా పూర్తి చేసి, నిర్దేశిత కాలపరిమితిలోగా ఒప్పందాన్ని కొలిక్కి తెచ్చేలా ఇరువర్గాలు సంయుప్తంగా కషడుపడుతున్నట్లు అధికారిక వర్గాలు వెల్లడించాయి.