క్లాడ్ ఏఐ సృష్టికర్త ఆంత్రోపిక్ ఐపీవో.. అండగా గూగుల్, అమెజాన్

సూర్య గ్లోబల్ టెక్ & ఫైనాన్షియల్ బ్యూరో, న్యూయార్క్: ప్రముఖ ఆర్టిఫిషియల్ ఇంటెలిజెన్స్  పరిశోధన సంస్థ 'ఆంత్రోపిక్'  పబ్లిక్ ఇష్యూదిశగా కీలక ముందడుగు వేసింది. అమెరికా సెక్యూరిటీస్ అండ్ ఎక్స్ఛేంజ్ కమిషన్  వద్ద దాఖలు చేసిన ప్రాథమిక ప్రాస్పెక్టస్  ప్రకారం.. గూగుల్ మాతృసంస్థ అయిన ఆల్ఫాబెట్  ఐపీవో మార్కెట్ ప్రక్రియలో దాదాపు 10 బిలియన్ డాలర్ల విలువైన షేర్లను కొనుగోలు చేసే అవకాశం కలిగి ఉండటంతో సంస్థలో అతిపెద్ద వాటాదారుగా అవతరించేందుకు రంగం సిద్ధమైంది. మరో టెక్ దిగ్గజం అమెజాన్ ఇప్పటికే ఆంత్రోపిక్‌లో 13 బిలియన్ డాలర్ల మేర పెట్టుబడులు పెట్టి అత్యంత కీలకమైన మద్దతుదారుగా నిలిచింది.

ఆదాయంలో 14 రెట్ల భారీ జంప్ – అకౌంటింగ్ నష్టం:
ఆంత్రోపిక్ వెల్లడించిన ఆర్థిక నివేదికల ప్రకారం, 2026 ప్రథమార్ధంలో సంస్థ ఆదాయం ఏకంగా 14 రెట్లు పెరిగి 16.29 బిలియన్ డాలర్లకు (రూ.1.38 లక్షల కోట్లు) చేరింది. గత ఏడాది ఇదే సమయంలో ఆదాయం కేవలం 1.16 బిలియన్ డాలర్లుగా ఉంది. అయితే సంస్థ వాల్యుయేషన్ భారీగా పెరగడంతో ముందస్తు ఇన్వెస్టర్లకు కేటాయించిన కన్వర్టబుల్ నోట్స్ మరియు సేఫ్‌ల (SAFEs) విలువ పెరగడం వల్ల కాగితంపై 80.7 బిలియన్ డాలర్ల అకౌంటింగ్ నష్టాన్ని (పేపర్ లాస్) నమోదు చేసినట్లు స్పష్టం చేసింది. వ్యాపార నిర్వహణ పరంగా రెండో త్రైమాసికంలో 974 మిలియన్ డాలర్ల నిర్వహణ లాభాన్ని (ఆపరేటింగ్ ప్రాఫిట్) ఆర్జించినట్లు తెలిపింది.

క్లౌడ్ భాగస్వామ్యాలు మరియు క్లౌడ్ ఖర్చుల ఒప్పందాలు:
ఆంత్రోపిక్ ఆర్జిస్తున్న ఆదాయంలో 48 శాతం నేరుగా అమెజాన్ వెబ్ సర్వీసెస్ (AWS), గూగుల్ క్లౌడ్, మైక్రోసాఫ్ట్ అజూర్ ప్లాట్‌ఫారమ్‌ల ద్వారానే వస్తున్నట్లు ఫైలింగ్‌లో పేర్కొంది. ఇదే సమయంలో కంప్యూటింగ్ అవసరాల కోసం అమెజాన్, గూగుల్‌లతో ఆంత్రోపిక్ దీర్ఘకాలిక ఒప్పందాలను కుదుర్చుకుంది. అమెజాన్‌తో 2036 నాటికి కనీసం 110 బిలియన్ డాలర్లు, గూగుల్ క్లౌడ్‌తో 2033 నాటికి 114.5 బిలియన్ డాలర్ల మేర కనీస వినియోగ ఒప్పందాలను కొనసాగిస్తున్నట్లు తెలిపింది. అమెజాన్ వద్ద 6.2 బిలియన్ డాలర్ల కన్వర్టబుల్ నోట్స్ ఉన్నప్పటికీ, దాని వాటా గరిష్టంగా 12 శాతానికి పరిమితం కానుంది.

కార్పొరేట్ గవర్నెన్స్ – ఫౌండర్లకే మెజారిటీ ఓటింగ్ హక్కులు:
పబ్లిక్ మార్కెట్లలో లిస్ట్ అయినప్పటికీ కంపెనీ వ్యూహాత్మక పగ్గాలు వ్యవస్థాపకుల వద్దే ఉండేలా పటిష్టమైన గవర్నెన్స్ నిర్మాణాన్ని ఏర్పాటు చేశారు. సీఈవో డారియో అమోడై, ప్రెసిడెంట్ డానియెలా అమోడై సహా ఏడుగురు సహ వ్యవస్థాపకులకు చెందిన 'ఫౌండర్ ఎల్‌ఎల్‌సీ'కి బోర్డులోని కీలక డైరెక్టర్ల ఎన్నికలో 50.1 శాతం ఓటింగ్ హక్కులు ఉండేలా క్లాస్ ఎఫ్ వాటాలను రూపొందించారు. బిలియన్ల డాలర్ల వాల్యుయేషన్‌తో రాబోతున్న ఆంత్రోపిక్ ఐపీవో అంతర్జాతీయ టెక్ క్యాపిటల్ మార్కెట్ చరిత్రలోనే అతిపెద్ద లిస్టింగ్‌లలో ఒకటిగా నిలవనుందని విశ్లేషకులు భావిస్తున్నారు.