అమెరికాను తాకిన టెక్ అంతరాయాల అల
సూర్య అంతర్జాతీయ డెస్క్: అమెరికాలో వరుసగా చోటుచేసుకుంటున్న సాంకేతిక అంతరాయాలు దేశవ్యాప్తంగా కలవరం సృష్టిస్తున్నాయి. ప్రైవేట్ రంగంతో పాటు ప్రభుత్వ కీలక వ్యవస్థలను సైతం ఈ టెక్ వైఫల్యాలు తాకడంతో అమెరికాలో ఒక్కసారిగా ఆందోళనకర వాతావరణం నెలకొంది. అయితే ఈ పరిణామాలపై స్పందించిన అమెరికా అధ్యక్షుడు డొనాల్డ్ ట్రంప్ ఎలాంటి అప్రమత్తత అవసరం లేదని, అంతా సవ్యంగానే ఉందని కొట్టిపారేశారు. భారీ వ్యవస్థల్లో ఇలాంటి సాంకేతిక సమస్యలు తలెత్తడం సహజమని, దీనిని పెద్ద విషయంగా చూడాల్సిన పనిలేదని ఆయన పేర్కొన్నారు.
గత కొన్ని రోజులుగా అమెరికాలో సాగుతున్న డిజిటల్ వైఫల్యాలు ప్రజలను బెంబేలెత్తిస్తున్నాయి. విమాన సర్వీసులు, బ్యాంకింగ్ రంగాలు మొదలుకొని జాతీయ భద్రతా వ్యవస్థల వరకు వివిధ సేవలు అస్తవ్యస్తంగా మారాయి. మైక్రోసాఫ్ట్ సేవలు నిలిచిపోవడం, ఫెడరల్ ఏవియేషన్ అడ్మినిస్ట్రేషన్ (ఎఫ్ఏఏ) ఆధ్వర్యంలో విమానాలు గంటల తరబడి నిలిచిపోవడం వంటి సంఘటనలు ప్రయాణికులను తీవ్ర ఇబ్బందులకు గురిచేశాయి. తాజాగా అమెరికా జాతీయ భద్రతా సంస్థ (ఎన్ఎస్ఏ)కు చెందిన అత్యంత గోప్యమైన అంతర్గత కమ్యూనికేషన్ నెట్వర్క్లోనూ సాంకేతిక లోపం తలెత్తడం తీవ్ర చర్చనీయాంశమైంది.
అయితే ఈ వరుస అంతరాయాల వెనుక ఎలాంటి సైబర్ దాడి లేదని ట్రంప్ సిబ్బంది స్పష్టం చేసింది. ఇవి ఏమాత్రం ప్రమాదకరమైనవి కాదని, వేర్వేరు వ్యవస్థల్లో సాధారణ నిర్వహణ, అప్గ్రేడ్లు మరియు ప్యాచ్ల కారణంగానే ఈ సమస్యలు తలెత్తినట్లు ఉన్నతాధికారులు వెల్లడించారు. విదేశీ కుట్రలు లేదా సైబర్ నేరగాళ్ల ప్రమేయం లేదని, దేశం పూర్తిగా సురక్షితంగా ఉందని సెక్రటరీ ఆఫ్ స్టేట్ మార్కో రూబియోతో పాటు పలువురు అధికార ప్రతినిధులు స్పష్టతనిచ్చారు.
ప్రభుత్వం ఎంతగా నచ్చజెప్పడానికి ప్రయత్నిస్తున్నప్పటికీ, వరుస వైఫల్యాలపై రాజకీయ వర్గాల్లో మరియు ప్రజల్లో అనుమానాలు వ్యక్తమవుతున్నాయి. ఇవన్నీ యాదృచ్ఛికంగా జరిగే సాంకేతిక లోపాలే కాకపోవచ్చని కొందరు శాసనసభ్యులు ఆందోళన వ్యక్తం చేస్తూ వైట్హౌస్ నుంచి సమగ్ర వివరణ కోరారు. ఏది ఏమైనప్పటికీ, ప్రస్తుత పరిస్థితుల్లో డిజిటల్ మౌలిక వసతుల భద్రతపై అమెరికాలో పెద్దఎత్తున చర్చ జరుగుతుండగా, అధ్యక్షుడి తేలికపాటి వ్యాఖ్యలు ప్రాధాన్యత సంతరించుకున్నాయి.