ఆర్టిఫిషియల్ ఇంటెలిజెన్స్పై పాప్ లియో 14 తీవ్ర హెచ్చరికలు
సూర్య అంతర్జాతీయ డెస్క్: ఆర్టిఫిషియల్ ఇంటెలిజెన్స్ (ఏఐ) వేగంగా విస్తరిస్తున్న తరుణంలో ప్రపంచ సమాజం సాంకేతిక పరిజ్ఞానం పట్ల అత్యంత జాగ్రత్తగా వ్యవహరించాలని కేథలిక్ ధార్మిక గురువు పాప్ లియో 14 తీవ్ర విజ్ఞప్తి చేశారు. నాలుగు రోజుల ప్రాన్స్ పర్యటనను శుక్రవారం ప్రారంభించిన ఆయన, ఏఐ సాంకేతికత భవిష్యత్తులో భూమిని నియంత్రించే 'యంత్రాల స్వర్గధామం'గా మార్చే ప్రమాదం ఉందని హెచ్చరించారు. పారిస్లోని ఎలిసీ ప్యాలెస్లో ఏర్పాటు చేసిన సమావేశంలో మాట్లాడిన ఆయన, నిత్య జీవితంలో విస్తరిస్తున్న ఈ డిజిటల్ విప్లవం మధ్య మానవత్వాన్ని కాపాడుకోవడానికి నైతిక విచక్షణతో కూడిన విద్య అత్యంత ఆవశ్యకమని స్పష్టం చేశారు. దాదాపు ఇరవై ఏళ్ల తర్వాత ఒక పాప్ ఫ్రాన్స్లో పర్యటించడం ఇదే తొలిసారి కావడం గమనార్హం.
ఈ సందర్భంగా పాప్ లియో క్రైస్తవ మత ప్రాథమిక సిద్ధాంతాలను పునరుద్ఘాటిస్తూ, వైద్య రంగాన్ని లాభాపేక్ష కలిగిన వ్యాపారంగా మార్చడాన్ని తప్పుబట్టారు. స్వచ్ఛంద మరణాలు, జన్యుపరమైన మార్పులు, అద్దె గర్భాలు మరియు మానవ అవయవాల వ్యాపారాన్ని ఆయన తీవ్రంగా నిరసించారు. ముఖ్యంగా నయం చేయలేని వ్యాధులతో బాధపడుతున్న వారికి సహాయక మరణాన్ని అనుమతిస్తూ ఇటీవల ఫ్రాన్స్ ప్రభుత్వం తీసుకున్న నిర్ణయంపై ఆయన ఆందోళన వ్యక్తం చేశారు. ఫ్రాన్స్ పర్యటనలో భాగంగా ఆయన పునరుద్ధరించబడిన చారిత్రాత్మక నోట్రే డామ్ కేథడ్రల్ను సందర్శించి ప్రత్యేక ప్రార్థనలు నిర్వహించనున్నారు. అనంతరం లూర్దేస్ మరియు మెట్జ్ ప్రాంతాలలో పర్యటించనున్నారు.
ఈ పర్యటనలో భాగంగా యునెస్కో ప్రధాన కార్యాలయంలో ప్రసంగించడంతో పాటు చర్చిలలో చోటుచేసుకున్న పాత లైంగిక వేధింపుల ఘటనల బాధితులను కూడా పాప్ కలవనున్నారు. చర్చి ప్రతిష్టను పునరుద్ధరించడానికి, శాంతి సందేశాన్ని అందించడానికి ఈ పర్యటన ఎంతో కీలకమైనదని భావిస్తున్నారు. పారిస్ విమానాశ్రయంలో ఫ్రెంచ్ అధ్యక్షుడు ఎమ్మాన్యుయేల్ మెక్రాన్ దంపతులు పాప్కు ఘన స్వాగతం పలికారు. ప్రపంచ వ్యాప్తంగా యుద్ధాలు, సాంకేతిక సవాళ్లు పెరుగుతున్న వేళ పాప్ లియో ఫ్రాన్స్ పర్యటన అంతర్జాతీయంగా ప్రాధాన్యత సంతరించుకుంది.
