సీతాదేవిని ఫైటర్‌గా చూపిస్తారా: రామాయణం సినిమా మేకర్స్‌పై ముకేష్ ఖన్నా ఘాటు వ్యాఖ్యలు
సూర్య ఎంటర్‌టైన్‌మెంట్ డెస్క్: నితీష్ తివారీ దర్శకత్వంలో రణ్‌బీర్ కపూర్, సాయి పల్లవి ప్రధాన పాత్రల్లో తెరకెక్కిన ప్రతిష్టాత్మక చిత్రం 'రామాయణం' తీవ్ర వివాదంలో చిక్కుకుంది. ఈ చిత్రంలో సీతాదేవి పాత్ర చిత్రీకరణపై సీనియర్ నటుడు ముకేష్ ఖన్నా తీవ్ర అభ్యంతరం వ్యక్తం చేశారు. సాయి పల్లవిని ఖడ్గం పట్టిన వీరనారిగా, రాక్షసులతో పోరాడే ఫైటర్‌గా చూపించడంపై ఆయన విమర్శలు గుప్పించారు. మూల కావ్యాలను తమకు తోచినట్లు మార్చి తెరకెక్కించడం సరికాదని, వినోదం కోసం కల్పిత కథనాలను ఇతిహాసాల్లోకి తీసుకురావడాన్ని ఆయన తప్పుపట్టారు.
ఒక ప్రత్యేక వీడియోలో ముకేష్ ఖన్నా మాట్లాడుతూ వాల్మీకి రామాయణంలో సీతాదేవిని ఫైటర్‌గా ఎక్కడా వర్ణించలేదని స్పష్టం చేశారు. సీతాదేవి ఓపిక, త్యాగం, సేవానిరతి, సంస్కారానికి ప్రతిరూపమని, ఆమె ఝాన్సీ లక్ష్మీబాయిలా యుద్ధాలు చేయలేదని పేర్కొన్నారు. ఒకవేళ ఆమె అంతటి యోధురాలే అయి ఉంటే రావణాసురుడు ఆమెను అపహరించే సమయంలో ఎందుకు ఎదురుదాడి చేయలేదని ప్రశ్నించారు. మేకర్స్ ఇష్టారాజ్యంగా మార్పులు చేయడం ప్రాచీన సంస్కృతిని, పురాణాలను అవమానించడమేనని ఆవేదన వ్యక్తం చేశారు.
నిర్మాతలు అద్భుత రామాయణం సూచనతో ఈ సీన్లను చేర్చామని చెప్పే వివరణలపై కూడా ముకేష్ ఖన్నా ఆగ్రహం వ్యక్తం చేశారు. వాల్మీకి రాసిన ప్రామాణిక రామాయణాన్ని పక్కన పెట్టి కలెక్షన్లే ధ్యేయంగా వ్యాపారం చేయడం సరికాదని హితవు పలికారు. వినోదం పేరుతో ప్రాచీన ఇతిహాసాలలోని పాత్ర స్వభావాలను మార్చే హక్కు ఎవరికీ లేదని స్పష్టం చేస్తూ, మేకర్స్ తమ ధోరణిపై సిగ్గుపడాలని తీవ్ర స్థాయిలో ధ్వజమెత్తారు.
Also Read: జడ్పీటీసీ బండి జగదీశ్ రెడ్డి కి సత్కారం
