నాగబాబు చేతుల మీదుగా ‘మైలురాయి’ టైటిల్ పోస్టర్ లాంచ్.. మహిళా నిర్మాతల బాటలో హన్సిక పయనించాలన్న మెగా బ్రదర్!

సూర్య ఎంటర్‌టైన్‌మెంట్ డెస్క్: హన్సి ప్రొడక్షన్స్ బ్యానర్‌పై ప్రొడక్షన్ నెం. 1గా శ్రీ హన్సిక పెద్దిరెడ్డి నిర్మిస్తున్న తాజా చిత్రం ‘మైలురాయి’. తవిటిరాజు తలచింతల సహ నిర్మాతగా వ్యవహరిస్తున్న ఈ చిత్రానికి టాలెంటెడ్ డైరెక్టర్ రఘువర్ధన్ కోట్ల దర్శకత్వం వహిస్తున్నారు. ఇందులో యువ నటీనటులు జగన్ యోగిరాజు, నవ్య చిట్యాల హీరో హీరోయిన్లుగా నటిస్తుండగా, సీనియర్ నటుడు దేవీ ప్రసాద్ కీలక పాత్రలో కనిపించనున్నారు. లక్ష్మణ్ మీసాల, పవన్ రమేష్, సునందిని, అంజు వాల్గుమన్ ఇతర ముఖ్య పాత్రలు పోషిస్తున్న ఈ మూవీ టైటిల్ లాంచ్ పోస్టర్‌ను సీనియర్ నటుడు, నిర్మాత, ఏపీ శాసనమండలి సభ్యుడు, ఏపీ గ్రీన్ ఛైర్మన్ శ్రీ నాగబాబు తాజాగా ఆవిష్కరించారు.

ఈ సందర్భంగా నాగబాబు మాట్లాడుతూ, ‘మైలురాయి’ టైటిల్ చాలా ఆసక్తికరంగా ఉందని మెచ్చుకున్నారు. నిర్మాత హన్సిక మంచి సినిమాతో తన కెరీర్‌ను ప్రారంభించారని, కొత్త దర్శకుడు మరియు యువ హీరోతో ఈ చిత్రాన్ని నిర్మించడం అభినందనీయమని కొనియాడారు. ఫిల్మ్ మేకింగ్‌లో మహిళలకు ఉండే బాధ్యత, క్రమశిక్షణ ఎంతో గొప్పవని వ్యాఖ్యానించారు. అశ్వనీదత్ కుమార్తెలు స్వప్న దత్, ప్రియాంక దత్‌తో పాటు నిహారిక, సుప్రియ యార్లగడ్డ వంటి మహిళా నిర్మాతలు చిత్ర పరిశ్రమలో మంచి గుర్తింపు తెచ్చుకుంటున్నారని, హన్సిక కూడా వారి బాటలోనే పయనిస్తూ మరిన్ని విజయాలు సాధించాలని నాగబాబు ఆకాంక్షించి, చిత్ర బృందానికి శుభాకాంక్షలు తెలిపారు.

పోస్టర్ లాంచ్ అనంతరం నిర్మాత శ్రీ హన్సిక పెద్దిరెడ్డి మాట్లాడుతూ, తమ మొదటి సినిమా ‘మైలురాయి’ టైటిల్ పోస్టర్‌ను నాగబాబు గారి చేతుల మీదుగా విడుదల చేయడం ఎంతో సంతోషంగా ఉందని చెప్పారు. ఇప్పటికే సినిమా చిత్రీకరణ పూర్తయిందని, ప్రస్తుతం ప్యాచ్ వర్క్, పోస్ట్ ప్రొడక్షన్ కార్యక్రమాలు శరవేగంగా జరుగుతున్నాయని తెలిపారు. త్వరలోనే టీజర్, పాటలను విడుదల చేసేందుకు సన్నాహాలు చేస్తున్నట్లు వెల్లడించారు. సహ నిర్మాత తవిటిరాజు తలచింతల మాట్లాడుతూ, నాగబాబు గారికి కృతజ్ఞతలు తెలుపుతూ, ఈ చిత్రాన్ని లవ్ అండ్ ఫ్యామిలీ డ్రామాగా తెరకెక్కిస్తున్నట్లు చెప్పారు.

దర్శకుడు రఘువర్ధన్ కోట్ల మాట్లాడుతూ, ఈ సినిమా భావోద్వేగాలతో కూడిన మంచి ప్రేమకథ అని, అన్ని వర్గాల ప్రేక్షకులకు కచ్చితంగా నచ్చుతుందని ధీమా వ్యక్తం చేశారు. కథానాయకుడు జగన్ యోగిరాజు మాట్లాడుతూ, టైటిల్ పోస్టర్‌కు ప్రేక్షకుల నుంచి విశేష స్పందన లభిస్తోందని, త్వరలోనే పాటలు, ట్రైలర్‌ను ప్రేక్షకుల ముందుకు తీసుకురాబోతున్నామని తెలిపారు. ప్రతి ఒక్కరూ హాయిగా ఆస్వాదించేలా ఈ చిత్రాన్ని రూపొందించినట్లు చెప్పారు. నాగబాబు లాంటి సీనియర్ నటుడి చేతుల మీదుగా టైటిల్ ఆవిష్కరణ జరగడంతో సినిమాపై ఇండస్ట్రీలో ఆసక్తి నెలకొంది.

Also Read: అనిల్ రావిపూడి చేతుల మీదుగా ‘డెస్టినీ’ మూవీ నుంచి ‘ఇద్దరి గుండెలపైన’ సాంగ్ రిలీజ్!