విక్కీ కౌశల్ నా గందరగోళానికి శాంతి.. బిజినెస్, మాతృత్వంపై కత్రినా కైఫ్ ఆసక్తికర వ్యాఖ్యలు
సూర్య ఎంటర్‌టైన్‌మెంట్ డెస్క్: బాలీవుడ్ నటి కత్రినా కైఫ్ తన వ్యక్తిగత జీవితం, వ్యాపార ప్రయాణంపై ఆసక్తికర విషయాలను పంచుకున్నారు. 2019లో ప్రారంభించి, ఆ తర్వాత యూఏఈ, యూకే దేశాలకు విస్తరించిన తన బ్యూటీ బ్రాండ్ కే బ్యూటీ నిర్వహణతో పాటు వైవాహిక జీవితం, మాతృత్వాన్ని సమన్వయం చేసుకుంటున్న తీరు గురించి ఆమె మాట్లాడారు. ఈ సందర్భంగా తన భర్త విక్కీ కౌశల్ అందిస్తున్న మద్దతును కొనియాడుతూ, తన ఒత్తిడి, గందరగోళానికి ఆయనే శాంతి అని పేర్కొన్నారు.
బిజినెస్ పట్ల ఉన్న అభిరుచితో గంటలు లెక్కపెట్టకుండా పనిచేస్తుంటానని, కానీ తన భర్త మాత్రం ఫోన్ పక్కన పెట్టమని చెబుతూ పని గంటలు లెక్కిస్తుంటారని కత్రినా సరదాగా చెప్పారు. శని, ఆదివారాల్లోనూ బిజినెస్ విషయాలపై చర్చలు కొనసాగుతుంటాయని, తాము కొత్తగా తల్లిదండ్రులైనప్పటికీ ఈ ప్రయాణాన్ని ఆస్వాదిస్తున్నామని తెలిపారు. నటిగా, వ్యాపారవేత్తగా, భార్యగా, తల్లిగా అన్ని పాత్రలను సమతూకం చేసుకోవడానికి తనకు తాను సమయం ఇచ్చుకుంటున్నట్లు స్పష్టం చేశారు.
కొన్నిసార్లు రోజు చివరికి అలసట, ఒత్తిడి ఎదురవుతుంటాయని, అలాంటి సమయాల్లో విక్కీ కౌశల్ ఎంతో అండగా నిలుస్తారని కత్రినా కైఫ్ వివరించారు. 2021 డిసెంబర్‌లో రాజస్థాన్‌లో వివాహం చేసుకున్న ఈ జంటకు 2025 నవంబర్‌లో విహాన్ కౌశల్ జన్మించారు. 2024లో మెర్రీ క్రిస్మస్ చిత్రంతో ప్రేక్షకులను పలకరించిన కత్రినా, ప్రస్తుతం కుటుంబం, వ్యాపార బాధ్యతలతో ముందుకు సాగుతుండగా, విక్కీ కౌశల్ లవ్ అండ్ వార్, మహావతార్ ప్రాజెక్టులతో బిజీగా ఉన్నారు.
