బిగ్‌బాస్ 10 తెలుగు: హైరిస్క్ జోన్‌లో రాంప్రసాద్, చరణ్.. ఎలిమినేషన్ టెన్షన్ షురూ!
టెలివిజన్ ప్రేక్షకులను ఎంతగానో అలరిస్తున్న రియాలిటీ షో ‘బిగ్‌బాస్ 10 తెలుగు’ సీజన్ రసవత్తరంగా సాగుతోంది. రోజుకో సరికొత్త టాస్క్‌తో హౌస్‌మేట్స్‌ను కన్ఫ్యూజ్ చేస్తున్న బిగ్‌బాస్, తాజాగా ఇచ్చిన ‘హైరిస్క్ జోన్’ టాస్క్‌తో హౌస్‌లో ఉత్కంఠను తారాస్థాయికి చేర్చాడు. ఈ టాస్క్‌లో భాగంగా రెండు వేర్వేరు టీమ్‌ల నుంచి ఇద్దరు సభ్యులను హైరిస్క్ జోన్‌లోకి పంపాలని ఆదేశించడంతో పాటు, ఆ జోన్‌లో ఉన్నవారు ఈ వారం ఎప్పుడైనా ఎలిమినేట్ అయ్యే ప్రమాదం ఉందని హెచ్చరించడంతో కంటెస్టెంట్లలో ఆందోళన మొదలైంది.
బ్లూ టీమ్ తరఫున ఎలాంటి పెద్ద వాదనలు, వివాదాలకు తావు లేకుండా ప్రముఖ కంటెస్టెంట్ రాంప్రసాద్ స్వయంగా హైరిస్క్ జోన్‌లోకి వెళ్లేందుకు అంగీకరించడం అందరినీ ఆశ్చర్యపరిచాడు. దీనికి గల అసలు కారణం శనివారం చెబుతానని ఆయన పేర్కొనడంతో నరేష్ ఈ నిర్ణయాన్ని బిగ్‌బాస్‌కు తెలియజేశాడు. మరోవైపు రెడ్ టీమ్‌లో రోహిత్ హైరిస్క్ జోన్‌లోకి వెళ్లబోడంటూ త్రిగుణ్ ముందే అంచనా వేయగా, చివరకు అందరి ఏకాభిప్రాయంతో చరణ్‌ను ఆ జోన్‌లోకి ఎంపిక చేశారు. ఈ పరిణామాలతో హౌస్‌లో వ్యూహాత్మక రాజకీయాలు ఒక్కసారిగా జోరందుకున్నాయి.
ఈ నామినేషన్ ప్రక్రియ సందర్భంగా హౌస్‌లో తీవ్రమైన భావోద్వేగ వాతావరణం నెలకొంది. హైరిస్క్ జోన్ నుంచి ఎలాగైనా సురక్షితంగా బయటపడతానని రాంప్రసాద్ ఎమోషనల్ కాగా, చరణ్‌తో మాట్లాడుతున్న సమయంలో రోహిత్ కన్నీటి పర్యంతమవడం ప్రేక్షకులను కంటతడి పెట్టించింది. రాబోయే ఎపిసోడ్‌లో ఈ హైరిస్క్ జోన్ ఎలిమినేషన్ కత్తి ఎవరి మెడపై పడుతుందనేది ఇప్పుడు ఆసక్తికరంగా మారింది.
