నానా పటేకర్, సింగీతం శ్రీనివాసరావు సేవలు చిరస్మరణీయం.. ఘన నివాళులర్పించిన ఏపీ ఎఫ్‌డీసీ చైర్మన్ భరత్ భూషణ్
సూర్య ఎంటర్‌టైన్‌మెంట్ డెస్క్: భారతీయ సినీ రంగానికి అమూల్యమైన సేవలు అందించిన ప్రముఖ నటుడు నానా పటేకర్, దిగ్గజ దర్శకుడు సింగీతం శ్రీనివాసరావుకు ఆంధ్రప్రదేశ్ ఫిల్మ్ డెవలప్‌మెంట్ కార్పొరేషన్ ఘనంగా నివాళులర్పించింది. గురువారం విజయవాడలోని పండిట్ నెహ్రూ బస్టేషన్ ఆర్టీసీ ప్రధాన హాల్‌లో ఏపీ ఎఫ్‌డీసీ ఆధ్వర్యంలో ప్రత్యేక బోర్డు సమావేశం నిర్వహించారు. ఈ సమావేశంలో ఏపీ ఫిల్మ్ డెవలప్‌మెంట్ కార్పొరేషన్ చైర్మన్ పి. భరత్ భూషణ్, మేనేజింగ్ డైరెక్టర్ కే. విశ్వనాథన్, బోర్డు సభ్యులు అందరూ కలిసి నానా పటేకర్, సింగీతం శ్రీనివాసరావు చిత్రపటాలకు పూలమాలలు వేసి శ్రద్ధాంజలి ఘటించారు.
ఈ సందర్భంగా చైర్మన్ భరత్ భూషణ్ మాట్లాడుతూ, భారతీయ చలనచిత్ర పరిశ్రమ అభివృద్ధికి ఈ ఇద్దరు దిగ్గజాలు చేసిన కృషి ఎప్పటికీ మరువలేనిదని కొనియాడారు. నటుడిగా నానా పటేకర్ తనదైన విలక్షణమైన అభినయంతో ప్రేక్షకుల మనస్సులో చెరగని ముద్ర వేసుకున్నారని పేర్కొన్నారు. ఎలాంటి పాత్రనైనా అత్యంత సహజంగా, భావోద్వేగభరితంగా పండిస్తూ దేశవ్యాప్తంగా ప్రత్యేక గుర్తింపు తెచ్చుకున్నారని తెలిపారు. ఆయన నటన భవిష్యత్ తరాల నటులకు ఎంతో స్ఫూర్తిదాయకమని ప్రశంసించారు.
అలాగే తెలుగు సినీ పరిశ్రమకు వినూత్నమైన, ప్రయోగాత్మక చిత్రాలను అందించడంలో దర్శకుడు సింగీతం శ్రీనివాసరావు శైలి ప్రత్యేకమని వక్తలు కొనియాడారు. ఆయన సృజనాత్మకత, దర్శకత్వ ప్రతిభ కేవలం తెలుగు సినిమా స్థాయిని మాత్రమే కాకుండా, భారతీయ చిత్ర పరిశ్రమ ఖ్యాతిని ప్రపంచవ్యాప్తంగా ఇనుమడింపజేశాయని పేర్కొన్నారు. అరుదైన కథాంశాలతో విభిన్న జోనర్‌లలో సినిమాలు తెరకెక్కించి దిగ్గజ దర్శకుడిగా నిలిచారని అభినందించారు.
సినీ రంగంలో నానా పటేకర్, సింగీతం శ్రీనివాసరావు అందించిన సేవలు, వారి అంకితభావం ఎప్పుడూ ఆదర్శప్రాయంగా నిలుస్తాయని బోర్డు సభ్యులు అభిప్రాయపడ్డారు. ఈ కార్యక్రమంలో పాల్గొన్న వారందరూ వారిద్దరితో ఉన్న అనుభవాలను, సినీ పరిశ్రమకు వారు చేసిన సేవలను స్మరించుకున్నారు. ఈ కార్యక్రమం ద్వారా టాలీవుడ్ ప్రముఖులు, సినీ కార్మికులు దిగ్గజాలకు ఘనంగా తమ గౌరవాన్ని చాటుకున్నారు.
Also Read: దసరాకు ఫ్యామిలీతో కలిసి నవ్వుల విందు.. కామ్రేడ్ కళ్యాణ్ ప్రీరిలీజ్ వేడుకలో హీరో శ్రీ విష్ణు
