హెచ్-1బీ నుంచి పీఈఆర్‌ఎం ద్వారా గ్రీన్ కార్డ్ పొందే ఉద్యోగుల సంఖ్య పరిమితమే: నాస్కామ్ కీలక ప్రకటన!
సూర్య వాణిజ్య డెస్క్: అమెరికాలో భారత ఐటీ దిగ్గజాలపై ట్రంప్-వాన్స్ సర్కారు తీసుకున్న తాత్కాలిక సస్పెన్షన్ చర్యలపై దేశీయ సాఫ్ట్‌వేర్ సేవల సమాఖ్య 'నాస్కామ్' (Nasscom) స్పందించింది. హెచ్-1బీ వీసాల నుంచి పర్మనెంట్ లేబర్ సర్టిఫికేషన్ (పీఈఆర్‌ఎం - PERM) ప్రక్రియ ద్వారా అమెరికాలో శాశ్వత నివాస హోదా (గ్రీన్ కార్డ్) పొందే భారతీయ టెక్ ఉద్యోగుల సంఖ్య వాస్తవానికి చాలా పరిమితంగానే ఉంటుందని నాస్కామ్ స్పష్టం చేసింది.
గత కొన్నేళ్లుగా భారత టెక్నాలజీ కంపెనీలు అమెరికాలో హెచ్-1బీ వీసాలపై ఆధారపడటాన్ని గణనీయంగా తగ్గించుకున్నాయని నాస్కామ్ గుర్తుచేసింది. దీనికి బదులుగా అమెరికా స్థానిక పౌరుల నియామకాలపైనే (లోకల్ హైరింగ్) ప్రధానంగా దృష్టి సారించి, అక్కడ పటిష్టమైన స్థానిక శ్రామిక శక్తిని నిర్మించాయని వివరించింది. అమెరికాలోని అత్యధిక 'ఫార్చ్యూన్ 500' కంపెనీలకు భారత టెక్ సంస్థలు సేవలందిస్తూ, నూతన ఆవిష్కరణలతో పాటు వేలాది స్థానిక ఉద్యోగాల కల్పనకు దోహదపడుతున్నాయని తెలిపింది.
ప్రపంచవ్యాప్తంగా 80కి పైగా దేశాల్లో కార్యకలాపాలు సాగిస్తున్న భారతీయ ఐటీ కంపెనీలు అన్నిచోట్లా స్థానిక చట్టాలు, నిబంధనలను కచ్చితంగా పాటిస్తున్నాయని నాస్కామ్ పేర్కొంది. అమెరికాలోనూ వర్తించే చట్టబద్ధమైన నియమ నిబంధనలకు దేశీయ సంస్థలు ఎల్లప్పుడూ కట్టుబడి ఉంటాయని, అక్కడి అధికారుల విచారణకు పూర్తి సహకారం అందిస్తాయని భరోసా వ్యక్తం చేసింది. అమెరికా లేబర్ డిపార్ట్‌మెంట్ తీసుకున్న ఈ నిర్ణయం వల్ల భారతీయ ఐటీ పరిశ్రమ మూలాలపై పడే ప్రభావం స్వల్పమేనని స్పష్టం చేసింది.
