భారత సేవల రంగం..అక్టోబర్‌లో 55.8కి పెరిగిన పీఎంఐ
సూర్య బిజినెస్ డెస్క్: దేశీయ సేవల రంగం ఊపందుకుంది. గడిచిన అక్టోబర్ నెలలో సేవల రంగ వ్యాపార కార్యకలాపాలు వేగవంతమై, హెచ్‌ఎస్‌బీసీ ఇండియా సర్వీసెస్ పర్చేజింగ్ మేనేజర్స్ ఇండెక్స్ (PMI) 55.8 పాయింట్లకు చేరింది. సెప్టెంబర్ నెలలో నమోదైన 55.2 పాయింట్లతో పోలిస్తే ఇది మెరుగైన వృద్ధిని సాధించడమే కాకుండా, గత నాలుగు నెలల కాలంలో అత్యంత గరిష్ట స్థాయిగా నమోదైందని తాజా సూచీ గణాంకాలు స్పష్టం చేస్తున్నాయి.
దేశీయంగా పెరిగిన వినియోగ డిమాండ్, నూతన ఆర్డర్ల ప్రవాహం ఆర్థిక వ్యవస్థలోని సేవల రంగానికి బలమైన ఊతాన్ని అందించాయని ఆర్థిక నిపుణులు వెల్లడించారు. పీఎంఐ సూచీ 50 పాయింట్ల కంటే పైన నమోదైతే అది ఆ రంగా పురోగతికి లేదా విస్తరణకు సంకేతంగా భావిస్తారు. ఆ రకంగా వరుసగా ప్రతి నెలా సేవల రంగంలో సానుకూల ధోరణి కనిపించడం భారత ఆర్థిక పునాది బలాన్ని సూచిస్తోందని విశ్లేషిస్తున్నారు.
నూతన ఆర్డర్లలో వేగం కనిపించినప్పటికీ, వ్యయ భారం మరియు ముడి సరుకుల ధరల పెరుగుదల రేటు తగ్గడం కంపెనీలకు ఊరటనిచ్చింది. ఉత్పత్తి ఖర్చులు కాస్త అదుపులోకి రావడంతో సేవలు అందిస్తున్న సంస్థలు తమ ఉత్పత్తుల ధరల పెంపును పరిమితం చేశాయి. దీనివల్ల క్లయింట్ల నుంచి ఆర్డర్లు మరింత పెరగడమే కాకుండా మార్కెట్ విస్తరణకు దారితీసింది.
కాగా, కొత్త క్లయింట్ల కలయిక మరియు స్థిరమైన డిమాండ్ కారణంగా భవిష్యత్ వ్యాపార దృక్పథంపై సేవల రంగ సంస్థలు బలమైన ధీమాను వ్యక్తం చేస్తున్నాయి. అక్టోబర్‌లో ఉపాధి కల్పన కొంత మందగించినప్పటికీ, వ్యాపార విస్తరణ వేగవంతంగా సాగుతుండటంతో రాబోయే నెలల్లో సేవలు మరియు ఉత్పత్తి రంగాల్లో మరిన్ని కొత్త ఉద్యోగాలు అందుబాటులోకి వచ్చే అవకాశం ఉందని పరిశ్రమ వర్గాలు ఆశాభావం వ్యక్తం చేస్తున్నాయి.
