యువతలో పెరుగుతున్న పక్షవాతం.. అప్రమత్తత అవసరం

నరసరావుపేట : మారుతున్న జీవనశైలి, వ్యాయామం లేకపోవడం, అధిక రక్తపోటు, మధుమేహం వంటి కారణాలతో యువతలో పక్షవాతం ముప్పు పెరుగుతోందని మెదడు, నరముల వైద్య నిపుణురాలు డాక్టర్ ఎం. సౌమ్య హెచ్చరించారు. ఈ సందర్భంగా డాక్టర్ సౌమ్య మాట్లాడుతూ ప్రతి సంవత్సరం అక్టోబర్ 29న నిర్వహించే ప్రపంచ పక్షవాత దినోత్సవం సందర్భంగా ఆమె మాట్లాడుతూ, ఈ ఏడాది ‘ప్రతి నిమిషం కీలకమే’ అనే నినాదం పక్షవాత చికిత్సలో సమయం ప్రాధాన్యతను తెలియజేస్తోందన్నారు.
ముఖం వంకరగా మారడం, చేయి లేదా కాలులో బలహీనత, మాట తడబడటం, చూపు తగ్గడం వంటి లక్షణాలు కనిపిస్తే నిర్లక్ష్యం చేయకుండా వెంటనే ఆసుపత్రికి వెళ్లాలని సూచించారు. సకాలంలో చికిత్స అందకపోతే ప్రాణాపాయంతో పాటు శాశ్వత వైకల్యం ఏర్పడే ప్రమాదం ఉందన్నారు. అధిక రక్తపోటు, మధుమేహాన్ని నియంత్రణలో ఉంచుకోవడం, సమతుల ఆహారం తీసుకోవడం, క్రమం తప్పకుండా వ్యాయామం చేయడం, పొగాకుకు దూరంగా ఉండటం ద్వారా పక్షవాతం ముప్పును తగ్గించుకోవచ్చని డాక్టర్ సౌమ్య తెలిపారు. యువతతో పాటు అన్ని వయస్సుల వారు అప్రమత్తంగా ఉండి, లక్షణాలు కనిపించిన వెంటనే వైద్య సహాయం పొందాలని సూచించారు.