సూర్య' వార్తకు తక్షణ స్పందన: ప్రమాదకర విద్యుత్ స్తంభం మార్పిడి

 అధికారుల నిర్లక్ష్యంపై కథనానికి కదలిక…   హుటాహుటిన రంగంలోకి దిగి సమస్యను పరిష్కరించిన ఏఈ వసంతరావు…  విద్యుత్ శాఖ, 'సూర్య' దినపత్రికకు స్థానికుల అభినందనలు.

​కావలి మేజర్ న్యూస్  :    ప్రజా సమస్యల పరిష్కారంలో వార్తాపత్రికల పాత్ర ఎంత కీలకమో మరోసారి రుజువైంది. కావలి పట్టణంలోని ఉదయగిరి రోడ్డులో, స్థానిక విద్యుత్ శాఖ ఏడీఈ (ADE) కార్యాలయానికి కూతవేటు దూరంలో ప్రమాదకరంగా మారిన విద్యుత్ స్తంభంపై 'సూర్య' దినపత్రికలో ప్రచురితమైన కథనానికి విద్యుత్ శాఖ అధికారులు తక్షణమే స్పందించారు.
​ప్రమాదం అంచుల నుంచి ఉపశమనం : ఉదయగిరి రోడ్డులో నిత్యం రద్దీగా ఉండే ప్రాంతంలో సదరు విద్యుత్ స్తంభం విరిగిపడే స్థితికి చేరింది. ఏ క్షణంలో ఏం జరుగుతుందో అని బాపూజీ నగర్‌కు వెళ్లే బాటసారులు, వాహనదారులు తీవ్ర భయాందోళనల మధ్య ప్రయాణించేవారు. అధికారుల దృష్టికి వెళ్లినా స్పందన కరువైందన్న అంశాన్ని ఎత్తిచూపుతూ 'సూర్య' పత్రికలో కథనం ప్రచురితమైంది.
​తక్షణ చర్యలు చేపట్టిన ఏఈ :  పత్రికలో వచ్చిన వార్తపై అసిస్టెంట్ ఇంజనీర్ (AE) వసంతరావు వెంటనే స్పందించారు. క్షేత్రస్థాయికి తన సిబ్బందితో హుటాహుటిన చేరుకుని, పాతబడిన ప్రమాదకర విద్యుత్ స్తంభాన్ని తొలగించి దాని స్థానంలో నూతన స్తంభాన్ని ఏర్పాటు చేశారు. త్వరితగతిన పనులు పూర్తి చేసి విద్యుత్ సరఫరాను పునరుద్ధరించడంతో పాటు పెద్ద ప్రమాదాన్ని నివారించారు.
​స్థానికుల హర్షం :  అధికారులు తక్షణమే స్పందించి సమస్యను పరిష్కరించడం పట్ల బాపూజీ నగర్ వాసులు, ఉదయగిరి రోడ్డులో ప్రయాణించే ద్విచక్ర వాహనదారులు, పాదాచారులు తీవ్ర సంతోషం వ్యక్తం చేశారు. ప్రజా సమస్యను వెలుగులోకి తెచ్చిన 'సూర్య' దినపత్రికకు, వెంటనే స్పందించి చర్యలు చేపట్టిన ఏఈ వసంతరావుతో పాటు విద్యుత్ శాఖ సిబ్బందికి స్థానిక ప్రజలు ప్రత్యేక అభినందనలు, ధన్యవాదాలు తెలిపారు.