సంక్షేమ వసతి గృహాలను ఆకస్మిక తనిఖీ

విజయనగరం మేజర్ న్యూస్: విజయనగరం జిల్లా న్యాయ సేవాధికార సంస్థ  కార్యదర్శి మరియు సీనియర్ సివిల్ జడ్జి డాక్టర్  ఎ. కృష్ణ ప్రసాద్  విజయనగరం పట్టణంలోని ఉన్న ప్రీ-మెట్రిక్ సోషల్ వెల్ఫేర్ బాలుర వసతి గృహం, పోస్ట్ మెట్రిక్ ప్రభుత్వ సోషల్ వెల్ఫేర్ బాలుర వసతి గృహం-2 మరియు పోస్ట్ మెట్రిక్ ప్రభుత్వ బీసీ బాలుర వసతి గృహం-2లను ఆకస్మికంగా సందర్శించి తనిఖీ నిర్వహించారు.
ఈ సందర్భంగా వసతి గృహాల్లో విద్యార్థులకు కల్పిస్తున్న మౌలిక సదుపాయాలు, తాగునీరు, పారిశుద్ధ్యం, మరుగుదొడ్లు, విద్యుత్ సౌకర్యం, భోజన వసతి, వంటగది, పరిసరాల పరిశుభ్రత తదితర అంశాలను క్షుణ్ణంగా పరిశీలించారు.
అనంతరం విద్యార్థులతో నేరుగా మాట్లాడి వసతి గృహాల్లో ఏవైనా సమస్యలు ఎదుర్కొంటున్నారా, భోజనం నాణ్యత ఎలా ఉంది, తాగునీరు , ఇతర సదుపాయాలు సక్రమంగా అందుతున్నాయా అని అడిగి తెలుసుకున్నారు. విద్యార్థులు తమ సమస్యలను స్వేచ్ఛగా తెలియజేయాలని, వారి సమస్యల పరిష్కారానికి సంబంధిత అధికారులు తగిన చర్యలు తీసుకోవాలని సూచించారు.
విద్యార్థులకు మెరుగైన వసతి, ఆరోగ్యకరమైన వాతావరణం, నాణ్యమైన ఆహారం మరియు విద్యాభ్యాసానికి అనుకూలమైన సౌకర్యాలు కల్పించడం సంబంధిత అధికారుల బాధ్యత అని ఆయన పేర్కొన్నారు. విద్యార్థుల సంక్షేమం, హక్కుల పరిరక్షణకు జిల్లా న్యాయ సేవాధికార సంస్థ ఎల్లప్పుడూ కృషి చేస్తుందని తెలిపారు.