స్మశానాన్ని ఆక్రమించుకుంటున్నారని ఆర్డీవో, తాహసిల్దార్ ను ఆశ్రయించిన మహిమలూరు గ్రామస్తులు

ఆత్మకూయు, మేజర్ న్యూస్ :   ఆత్మకూరు మండలం మహిమలూరు గ్రామంలోని స్మశానాన్ని కొందరు ఆక్రమించుకుంటున్నారని గ్రామానికి చెందిన చాకలి, ముదిరాజు, బలిజ, మంగలి కుటుంబాలకు చెందిన సుమారు 250 మంది మంగళవారం ఆత్మకూరు ఆర్డీవోను, తాహసిల్దార్ని కలిసి వినతి పత్రం అందించారు.. 1999లో తమకు గ్రామంలోని  575/2ఏ ,2బి  సర్వేనెంబర్ల లోని నాలుగున్నర ఎకరాల భూమిని గ్రామంలోని బలిజ, ముదురాజు, చాకలి, మంగలి కులాలకు చెందిన 300 కుటుంబాలకు స్మశానానికి కేటాయించారని, ఇటీవల కొందరు స్మశానంలోని కొంత స్థలాన్ని ఆక్రమించి స్వాధీన పరుచుకున్నారని వారు పేర్కొంటూ ఈ విషయమై విచారణ చేపట్టి తమకు న్యాయం చేయాలని ఆత్మకూరు ఆర్డీవో బి.పావని కి , తాహసిల్దార్  పద్మజాకుమారికి వినతి పత్రాలు అందించారు. అనంతరం గ్రామస్తులు మాట్లాడుతూ స్మశానానికి కేటాయించిన ఈ స్థలంలో  కొందరు ఉద్దేశపూర్వకంగా ఆక్రమించుకుంటూ వారి స్వప్రయోజనాలకు ఉపయోగించుకుంటున్నారని ఈ స్మశానాన్ని తమ గ్రామంలోని నాలుగు కులస్తులు ఉపయోగించే స్మశానమని దీనిని హద్దులు ఏర్పాటు చేసి ప్రహరి నిర్మించి తమకు కేటాయించాలని కోరారు.ఈ కార్యక్రమంలో గ్రామానికి చెందిన వేణు, రమణయ్య, పుల్లయ్య, వెంకటేశ్వర్లు, హరి తదితరులు పాల్గొన్నారు.