శాంతిభద్రతలకు విఘాతం కలిగిస్తే చట్టపరమైన చర్యలు తప్పవు

పుల్లలచెరువు మేజర్ న్యూస్

మండలంలో శాంతిభద్రతలకు విఘాతం కలిగించేలా వ్యవహరించే వారిపై చట్టపరమైన చర్యలు తప్పవని పుల్లలచెరువు ఎస్సై బి. సాంబశివరావు హెచ్చరించారు. ప్రజలు ప్రశాంత వాతావరణంలో జీవించేలా పోలీసు శాఖ నిరంతరం నిఘా కొనసాగిస్తోందని తెలిపారు.మండల పరిధిలో ఎలాంటి అవాంఛనీయ సంఘటనలకు తావులేకుండా ముందస్తు చర్యలు చేపడుతున్నామని ఎస్సై పేర్కొన్నారు. గ్రామాల్లో గొడవలు, వివాదాలు సృష్టించడం, ప్రజలకు ఇబ్బందులు కలిగించడం, శాంతిభద్రతలకు భంగం కలిగించే చర్యలకు పాల్పడటం వంటి వాటిని ఉపేక్షించబోమన్నారు.
ప్రజలు చట్టాన్ని తమ చేతుల్లోకి తీసుకోకుండా ఏదైనా సమస్య తలెత్తితే పోలీసులకు సమాచారం అందించాలని సూచించారు. ముఖ్యంగా వ్యక్తిగత వివాదాలను ఘర్షణలకు దారితీయకుండా చట్టపరమైన మార్గంలో పరిష్కరించుకోవాలని కోరారు. సోషల్‌ మీడియాలో కూడా రెచ్చగొట్టే వ్యాఖ్యలు,  అసత్య ప్రచారాలు చేస్తే నిబంధనల ప్రకారం చర్యలు తీసుకుంటామని హెచ్చరించారు.మండలంలో శాంతిభద్రతల పరిరక్షణకు ప్రజలు పోలీసులకు సహకరించాలని ఎస్సై బి. సాంబశివరావు కోరారు. శాంతికి భంగం కలిగించే వ్యక్తుల సమాచారం ఉంటే పోలీసులకు తెలియజేయాలని సూచించారు.