సారవకోటలో వైఎస్సార్‌సీపీ విస్తృతస్థాయి సమావేశం
- కార్యకర్తలకు ఐడీ కార్డుల పంపిణీ..
- మాజీ జెడ్పీటీసీ, ఎంపీటీసీలకు సన్మానం..
సారవకోట అక్టోబర్ 2 మేజర్ న్యూస్ : మండలంలో వైఎస్సార్ కాంగ్రెస్ పార్టీ ఆధ్వర్యంలో నిర్వహించిన విస్తృతస్థాయి సమావేశానికి మాజీ ఉప ముఖ్యమంత్రి, వైఎస్సార్‌సీపీ జిల్లా అధ్యక్షుడు ధర్మాన కృష్ణదాస్, యువ నాయకుడు డాక్టర్ ధర్మాన కృష్ణ చైతన్య హాజరయ్యారు. పార్టీ సంస్థాగత అంశాలు, రానున్న స్థానిక సంస్థల ఎన్నికలకు సంబంధించిన కార్యాచరణపై నాయకులు, కార్యకర్తలతో చర్చించారు.
ఈ సందర్భంగా ధర్మాన కృష్ణదాస్ మాట్లాడుతూ స్థానిక సంస్థల ఎన్నికల్లో పార్టీ అభ్యర్థులకు మద్దతుగా నాయకులు, కార్యకర్తలు సమన్వయంతో పనిచేయాలని పిలుపునిచ్చారు. మండల పరిషత్, జిల్లా పరిషత్ ప్రాదేశిక నియోజకవర్గ స్థానాల్లో పార్టీ అభ్యర్థుల కోసం ఐక్యంగా పనిచేయాలని సూచించారు.
పార్టీ కోసం పనిచేస్తున్న నాయకులు, కార్యకర్తలకు అండగా ఉంటామని ఆయన తెలిపారు. పార్టీ శ్రేణులకు ఎదురయ్యే సమస్యలపై ప్రజాస్వామ్య పద్ధతిలో పోరాటం చేస్తామని పేర్కొన్నారు.
పార్టీ కార్యకర్తలను గుర్తించి వారికి ఐడీ కార్డులు అందజేసే కార్యక్రమంలో భాగంగా సమావేశంలో పలువురు నాయకులు, కార్యకర్తలకు ఐడీ కార్డులను పంపిణీ చేశారు. అనంతరం ఐదేళ్ల పదవీకాలాన్ని పూర్తి చేసిన మాజీ జెడ్పీటీసీలు, ఎంపీటీసీలను ఘనంగా సన్మానించి అభినందించారు. పార్టీ కార్యక్రమాల్లో వారు అందించిన సేవలను నాయకులు ఈ సందర్భంగా గుర్తుచేశారు.
