రూ.. 25.6 లక్షలకు సర్పంచ్ పదవి నక్కలపల్లి లో ఏకగ్రీవం.
బెళుగుప్ప: అనంతపురం జిల్లా బెళుగుప్ప మండలం నక్కలపల్లి గ్రామంలో సర్పంచ్ ఎంపిక ఆసక్తికరంగా మారింది. ఎన్నికల సమయంలో జరిగే ఖర్చులు, వివాదాలకు దూరంగా ఉండటంతో పాటు గ్రామాభివృద్ధికి నిధులు సమకూర్చుకోవాలనే ఉద్దేశంతో గ్రామస్తులు వినూత్న పద్ధతిని అనుసరించారు. జనరల్ మహిళకు రిజర్వ్ అయిన సర్పంచ్ స్థానానికి తొమ్మిది మంది పోటీ పడగా, గ్రామాభివృద్ధికి తాము ఎంత మొత్తం అందించగలమో అభ్యర్థులు చీటీలపై రాసి డబ్బాలో వేశారు. అనంతరం గ్రామస్తుల సమక్షంలో చీటీలను పరిశీలించగా, సుదర్శనరెడ్డి తన భార్య అఖిల పేరుతో అత్యధికంగా రూ.25.6 లక్షలు అందించేందుకు ముందుకు వచ్చారు. దీంతో గ్రామస్తులు అఖిలను ఏకగ్రీవంగా ఎంపిక చేసినట్లు సమాచారం. నక్కలపల్లిలో గత ఎన్నికల సమయంలోనూ ఇదే తరహా విధానాన్ని అనుసరించారు. అప్పట్లో రామిరెడ్డి రూ.21 లక్షలు అందించేందుకు ముందుకు వచ్చి సర్పంచ్గా ఎంపికయ్యారు. ఈసారి ఆ మొత్తాన్ని మించి రూ.25.6 లక్షలు ప్రకటించడంతో గ్రామంలో ఈ ఎంపిక ప్రక్రియ చర్చనీయాంశంగా మారింది. గ్రామాభివృద్ధికి నిధులు సమకూర్చుకోవాలనే ఆలోచన ఒకవైపు ఉన్నప్పటికీ, సర్పంచ్ పదవిని డబ్బు ఆధారంగా ఎంపిక చేయడంపై ప్రజాస్వామ్య విలువలు, ఎన్నికల నిబంధనల కోణంలోనూ చర్చ జరుగుతోంది. గ్రామస్తుల ఏకగ్రీవ నిర్ణయంతో పాటు అధికారిక ఎన్నికల ప్రక్రియ, నిబంధనలు కూడా తప్పనిసరిగా పాటించాల్సి ఉంటుంది.