ప్రొద్దుటూరు అభివృద్ధికి కేంద్ర మంత్రులకు ఎమ్మెల్యే వరదరాజులరెడ్డి వినతి

ప్రొద్దుటూరు అర్బన్ మేజర్ న్యూస్:

ప్రొద్దుటూరు నియోజకవర్గ అభివృద్ధిలో భాగంగా పలు కీలక మౌలిక వసతుల పనులను చేపట్టాలని ఎమ్మెల్యే నంద్యాల వరదరాజులరెడ్డి కేంద్ర మంత్రులను కోరారు. కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడును కలిసి, ప్రొద్దుటూరు నియోజకవర్గానికి అత్యంత అవసరమైన దువ్వూరు రోడ్డును 4-లేన్ల రహదారిగా అభివృద్ధి చేయడంతో పాటు, ప్రొద్దుటూరుకు కేంద్రీయ విశ్వవిద్యాలయం మంజూరు చేయాలని ఎమ్మెల్యే విజ్ఞప్తి చేశారు. అదేవిధంగా నియోజకవర్గ పరిధిలోని మిస్సింగ్ హైవే లింక్ రోడ్లను జాతీయ రహదారుల పరిధిలోకి తీసుకురావాలని కోరారు. ఈ అంశంపై కేంద్ర రోడ్డు రవాణా, రహదారుల శాఖ మంత్రి నితిన్ గడ్కరీతో మాట్లాడి సంబంధిత పనులను త్వరితగతిన పూర్తి చేయించేలా చర్యలు తీసుకోవాలని ఎమ్మెల్యే కోరినట్లు తెలిపారు.
ప్రొద్దుటూరు నియోజకవర్గానికి అవసరమైన కీలక రహదారి, విద్యా మౌలిక వసతుల పనులను కేంద్ర స్థాయిలో సమన్వయం చేసి త్వరగా అమలు చేయించేందుకు చర్యలు తీసుకోవాలని ఎమ్మెల్యే వరదరాజులరెడ్డి విజ్ఞప్తి చేశారు. ఈ సందర్భంగా అనకాపల్లి ఎంపీ సీఎం రమేష్ నాయుడు తదితరులు ఉన్నారు.