ప్రజల మన్ననలు పొందిన ఎస్సై లోకేష్ కుమార్ కు ఘనంగా వీడ్కోలు.
కంబదూరు: పోలీసు శాఖలో విధులు నిర్వహించడం అంటే కేవలం శాంతిభద్రతలను పరిరక్షించడమే కాకుండా ప్రజలకు భరోసా కల్పిస్తూ, సమాజంలో అసాంఘిక కార్యకలాపాలను అరికట్టి ప్రజల మన్ననలు పొందడం కూడా ముఖ్యమని నిరూపించిన అధికారి కంబదూరు మండల ఎస్ఐ లోకేష్ కుమార్. గత ఏడాదిన్నర కాలంగా కంబదూరు మండల ఎస్ఐగా బాధ్యతలు నిర్వహించి, బదిలీపై వెళ్తున్న ఆయనకు మండల ప్రజలు, ప్రజా సంఘాల నాయకులు, సీనియర్ జర్నలిస్టులు, సోషల్ మీడియా ప్రతినిధులు, యువకులు ఘనంగా వీడ్కోలు పలికారు. ఆయన బదిలీ వార్త తెలుసుకున్న పలువురు అభిమానులు, శ్రేయోభిలాషులు పోలీస్ స్టేషన్కు చేరుకుని తమ అభిమానాన్ని చాటుకున్నారు. ఈ సందర్భంగా ఎస్ఐ లోకేష్ కుమార్ మండలంలో నిర్వహించిన సేవలను, విధి నిర్వహణలో చూపిన చొరవను పలువురు గుర్తుచేసుకున్నారు. ముఖ్యంగా మండల పరిధిలో వివిధ ఆలయాల్లో చోరీకి గురైన విలువైన ఆలయ సంపదను పోలీసులు సమర్థవంతంగా రికవరీ చేయడంలో ఆయన కీలకంగా వ్యవహరించడం ప్రశంసనీయమని పేర్కొన్నారు. ఈ కేసుల్లో పురోగతి సాధించి ఆలయ సంపదను తిరిగి స్వాధీనం చేసుకోవడంతో జిల్లా ఎస్పీ జగదీశ్ నుంచి సైతం ప్రశంసలు అందుకున్నారని గుర్తుచేశారు. అలాగే మండలంలో పేకాట, మట్కా, జూదం, దొంగతనాలు వంటి అసాంఘిక కార్యకలాపాలపై ఉక్కుపాదం మోపుతూ, వాటి నియంత్రణకు కఠిన చర్యలు చేపట్టారని కొనియాడారు. చట్టవ్యతిరేక కార్యకలాపాలకు పాల్పడే వారిపై చట్ట ప్రకారం చర్యలు తీసుకుంటూ శాంతిభద్రతల పరిరక్షణకు కృషి చేశారని తెలిపారు. ప్రజల సమస్యలను తెలుసుకుంటూ, పోలీస్ శాఖపై ప్రజలకు నమ్మకం కలిగించేలా వ్యవహరించారని పలువురు అభిప్రాయపడ్డారు. ఈ సందర్భంగా ఎరుకల సేవా సంఘం అధ్యక్షుడు ములకనూరు ఎరుకుల సుబ్బరాయుడు, సీపీఐ నాయకుడు మంజునాథ్, సీనియర్ జర్నలిస్ట్, జనస్వరం సోషల్ మీడియా ప్రతినిధి ముత్యాలప్ప, ఫోటో స్టూడియో హనుమంతు, మారుతి, అండేపల్లి హరి తదితరులు ఎస్ఐ లోకేష్ కుమార్కు పూలమాలలు వేసి, దుశ్శాలువాలు కప్పి ఘనంగా సత్కరించారు. ఈ సందర్భంగా ఆయనతో తమకున్న అనుబంధాన్ని, ఆయన సేవల ద్వారా పొందిన అనుభవాలను పంచుకున్నారు. ప్రజా సంఘాల ప్రతినిధులు, యువకులు, మండల ప్రజలు పెద్ద సంఖ్యలో పాల్గొని ఆయనకు శుభాకాంక్షలు తెలియజేశారు. అనంతరం ఎస్ఐ లోకేష్ కుమార్ మాట్లాడుతూ, కంబదూరు మండలంలో ఏడాదిన్నర కాలం పాటు విధులు నిర్వహించడం తనకు మంచి అనుభవమని తెలిపారు. విధి నిర్వహణలో ప్రజలు, ప్రజా సంఘాల నాయకులు, వివిధ రాజకీయ పార్టీల ప్రతినిధులు, జర్నలిస్టులు, యువకులు అందించిన సహకారం మరువలేనిదని పేర్కొన్నారు. శాంతిభద్రతల పరిరక్షణతో పాటు ప్రజా సమస్యల పరిష్కారంలో సహకరించిన ప్రతి ఒక్కరికీ ప్రత్యేక కృతజ్ఞతలు తెలిపారు. ఒక పోలీసు అధికారిగా తన బాధ్యతలను నిర్వహించే క్రమంలో ప్రజల నుంచి లభించిన ఆదరణ, అభిమానం ఎంతో సంతోషాన్ని కలిగించాయని అన్నారు. బదిలీ అనేది ఉద్యోగ నిర్వహణలో సహజమైన ప్రక్రియ అయినప్పటికీ, కంబదూరు ప్రజలతో ఏర్పడిన అనుబంధం ఎప్పటికీ గుర్తుండిపోతుందని పేర్కొన్నారు. ఏడాదిన్నర కాలం పాటు కంబదూరు మండలంలో విధులు నిర్వహించిన ఎస్ఐ లోకేష్ కుమార్కు ప్రజలు, ప్రజా సంఘాల ప్రతినిధులు, జర్నలిస్టులు, యువత ఘనంగా వీడ్కోలు పలకడం ఆయన సేవలకు లభించిన ప్రజాదరణకు నిదర్శనంగా నిలిచింది.