పోస్టాఫీసు ద్వారా ఇంటికే కనకదుర్గమ్మ లడ్డూ ప్రసాదం
భక్తులకు మరింత చేరువగా ప్రసాదం.. సమీప పోస్టాఫీసులో బుకింగ్ సౌకర్యం
మార్కాపురం మేజర్ న్యూస్:
శ్రీ కనకదుర్గ అమ్మవారి భక్తులకు భారత తపాలా శాఖ మరో సౌకర్యాన్ని అందుబాటులోకి తీసుకొచ్చింది. అమ్మవారి లడ్డూ ప్రసాదాన్ని ఇక భక్తులు తమ ఇంటి వద్దకే పొందే విధంగా పోస్టాఫీసు ద్వారా హోమ్ డెలివరీ సదుపాయాన్ని కల్పించింది. దీంతో దూర ప్రాంతాల్లో నివసించే భక్తులు ఆలయానికి ప్రత్యక్షంగా వెళ్లకుండానే అమ్మవారి లడ్డూ ప్రసాదాన్ని ఇంటి వద్దే పొందే అవకాశం ఏర్పడింది.భక్తులు తమ సమీపంలోని పోస్టాఫీసును సంప్రదించి శ్రీ కనకదుర్గ అమ్మవారి లడ్డూ ప్రసాదాన్ని బుక్ చేసుకోవచ్చు. బుక్ చేసిన ప్రసాదాన్ని తపాలా శాఖ ఆధ్వర్యంలో సురక్షితంగా ప్యాక్ చేసి, ఇండియా పోస్ట్ ద్వారా భక్తులు అందించిన చిరునామాకు పంపిస్తారు. దీంతో వివిధ ప్రాంతాల్లో నివసిస్తున్న భక్తులకు ప్రసాదం పొందడం మరింత సులభతరం కానుంది.ప్రత్యేకంగా దూర ప్రాంతాల్లో నివసించే భక్తులు, వృద్ధులు, ఆలయానికి ప్రత్యక్షంగా వెళ్లలేని వారు ఈ సదుపాయాన్ని వినియోగించుకోవచ్చు. పోస్టాఫీసు ద్వారా ప్రసాదాన్ని ఇంటికే పంపించే విధానం భక్తులకు సౌకర్యవంతంగా ఉండటంతో పాటు, తపాలా శాఖ సేవలను మరింత విస్తరించేలా ఉందని అధికారులు తెలిపారు.భక్తులు ఈ సదుపాయాన్ని సద్వినియోగం చేసుకుని శ్రీ కనకదుర్గ అమ్మవారి లడ్డూ ప్రసాదాన్ని ఇంటి వద్దనే పొందాలని మార్కాపురం పోస్టల్ డివిజన్ సూపరింటెండెంట్ జి.వి. శ్రీనివాసులు కోరారు.
