పొలం వద్ద ఘర్షణలో వ్యక్తి మృతి
పొలం వద్ద ఘర్షణలో వ్యక్తి మృతి
గోనెగండ్ల, సెప్టెంబరు 30:
పొలం వద్ద జరిగిన ఘర్షణలో ఓ వ్యక్తి మృతి చెందిన ఘటన గోనెగండ్ల మండలంలో బుధవారం చోటుచేసుకుంది. పోలీసుల వివరాల మేరకు.. గోనెగండ్ల లక్ష్మీపేట కాలనీకి చెందిన కురవ రంగడు అలియాస్ రంగముని (40), తన సోదరుడు వెంకటేశ్తో కలిసి ఐరన్బండ గ్రామ సమీపంలోని పొలంలో ఎరువుల మందు కలుపుతున్నారు.
అదే సమయంలో అదే పొలంలోని రస్తాలో భానుచందర్, వెంకట్రముడు ద్విచక్రవాహనంపై వెళ్తుండగా.. వాహనం తార్పాలిన్పై నుంచి వెళ్లడంతో అది చినిగిపోయి ఎరువుల మందు కిందపడింది. దీంతో ఇరువర్గాల మధ్య వాగ్వాదం జరిగింది. ఈ క్రమంలో భానుచందర్ పొలంలో ఉన్న ఇనుప చెలకతో రంగడు ఛాతిపై కొట్టినట్లు పోలీసులు తెలిపారు.
తీవ్రంగా నొప్పి రావడంతో రంగడు ఇంటికి చేరుకున్నాడు. నొప్పి ఎక్కువ కావడంతో చికిత్స కోసం ఎమ్మిగనూరుకు తరలిస్తుండగా మార్గమధ్యంలో మృతి చెందాడు.
మృతదేహంతో బంధువుల ఆందోళన
రంగడు మృతితో ఆగ్రహించిన బంధువులు నిందితులను తమ ముందు హాజరుపరిచి న్యాయం చేయాలని డిమాండ్ చేస్తూ గోనెగండ్ల వైఎస్సార్ సర్కిల్ వద్ద మృతదేహంతో రోడ్డుపై ధర్నా నిర్వహించారు. పోలీసులు అక్కడికి చేరుకుని బంధువులను శాంతింపజేశారు. మృతుడి బంధువుల ఫిర్యాదు మేరకు కేసు నమోదు చేసి దర్యాప్తు చేస్తున్నట్లు సీఐ చంద్రబాబు తెలిపారు.
