పెట్రోల్ బంక్ లో డీజిల్ కు బదులు నీరు

పెట్రోల్ బంకులో డీజిల్‌కు బదులు నీరు పాడైపోయిన పలు వాహన ఇంజన్లు 

 రైతులు, వాహన యజమానులు బంక్‌ వద్ద ఆందోళన

ఉండి, మేజర్ న్యూస్: ఉండి మండలం ఎన్ ఆర్ పి అగ్రహారంలో గల భారత పెట్రోలియం బంక్‌లో డీజిల్‌కు బదులు నీరు రావడంతో ఆ నీటిని వాహనాలకు కొట్టడంతో వాహనాలు పాడైపోయి వాహన యజమానులు తీవ్ర ఇబ్బందులకు గురయ్యారు. ఈ ఘటనలో పాములపర్రు గ్రామానికి చెందిన ఇద్దరు ఆక్వా రైతులు ఈ బంకులో డీజిల్ రెండు జనరేటర్ లో పోయడంతో అవి కాలిపోయాయని వారు ఆవేదన వ్యక్తం చేశారు. మరో ఐదు కార్లు, జేసీబీ కూడా దెబ్బతిన్నట్లు వాహన యజమానులు  తెలిపారు. దీంతో కార్ల యజమానులు, ఆక్వా రైతులు, జేసీబీ డ్రైవర్‌ సదరు బంక్‌ వద్ద ఆందోళనకు దిగారు. ఆందోళనకు దిగిన బాధితులతో బంక్‌ యజమాని సంప్రదింపులు జరిపి నష్టపోయిన వారి వాహనాలు, జనరేటర్ల మరమ్మతుకు అయ్యే ఖర్చులు తానే భరిస్తానని హామీ ఇవ్వడం జరిగింది విషయం తెలుసుకున్న పలువురు స్థానికులు సివిల్‌ సప్లైస్‌ డిప్యూటీ తహసీల్దార్‌ సూర్యనారాయణరాజుకు సమాచారం అందించారు. దీంతో ఆయన భారత్ పెట్రోలియం బంక్‌ వద్దకు చేరుకుని యజమానితో మాట్లాడి ఘటనకు సంబంధించిన వివరాలను తెలుసుకున్నారు. ఈ సందర్భంగా ఆయన మాట్లాడుతూ గతంలో కూడా ఇదే బంక్‌లో ఇటువంటి ఘటనలు పలుమార్లు జరిగినట్లు తన దృష్టికి వచ్చిందని ఇప్పుడు మరొకసారి అదే పునరావతమైందని తెలిపారు. దీనిపై ఉన్నతాధికారులకు ఫిర్యాదు చేసి బంకుపై తగిన చర్యలు తీసుకునేలా చూస్తామని అన్నారు. కాగా బంక్‌ యజమాని మాట్లాడుతూ బంక్‌లో రెండు డీజిల్‌ ట్యాంకులు ఉండగా వాటిలో ఒక ట్యాంకులోకి వర్షాలు కారణంగా నీరు చేరిందని తెలిపారు. దీంతో నష్టపోయిన వారికి మరమ్మతులు చేయిస్తామని హామీ ఇచ్చామని, అందుకు వినియోగదారులు అంగీకరించడంతో ఆందోళన విరమించారని వివరించారు. ఇదిలా ఉండగా పలువురు వినియోగదారులు మాట్లాడుతూ గత కొన్ని సంవత్సరాలుగా వర్షాకాలంలో ఇదే విధంగా జరుగుతుందని పలుమార్లు వినియోగదారులు రోడ్డుపై ధర్నాలు చేయడం జరిగిందని అయినప్పటికీ అధికారులు నిమ్మకు నీరెత్తినట్లు వ్యవహరిస్తున్నారని బంకు యజమానిపై ఎటువంటి చర్యలు తీసుకోకుండా నామమాత్రపు తనిఖీలు చేసి చేతులు దులుపుకుంటున్నారని అధికారులు తీరుపై మండిపడ్డారు. ఈ విషయంపై జిల్లా అధికారులు జోక్యం చేసుకోవాలని వాహనదారులు కోరుతున్నారు.

 ఈతకోట రాజు ఉండి రిపోర్టర్