ముంపు ప్రాంతాల్లో డాక్టర్ ధర్మాన కృష్ణచైతన్య పర్యటన: రైతులకు, మత్స్యకారులకు తక్షణ పరిహారం అందించాలని డిమాండ్

​పోలాకి, సెప్టెంబర్ 24, మేజర్ న్యూస్ :

తుఫాన్ ప్రభావంతో మండలంలోని పలు గ్రామాల్లో నీటమునిగిన పంట పొలాలను, ప్రభావిత ప్రాంతాలను యువ నాయకులు డాక్టర్ ధర్మాన కృష్ణచైతన్య గురువారం క్షేత్రస్థాయిలో పరిశీలించారు. మండల పరిధిలోని సుసరాం, పిరియగ్రహం, అంబిరుపేట, గాతలవలస, డీఎల్‌పురం, బెలమర తదితర ముంపు గ్రామాల్లో ఆయన విస్తృతంగా పర్యటించారు.
​ఈ సందర్భంగా నీటమునిగిన పంటలను పరిశీలించి, తీవ్రంగా నష్టపోయిన రైతులను పరామర్శించారు. పంట నష్టం తీవ్రతను అన్నదాతలను అడిగి తెలుసుకున్నారు. అనంతరం మత్స్యకార గ్రామమైన గుప్పిడిపేట తీర ప్రాంతాన్ని సందర్శించి, స్థానిక మత్స్యకారులతో మాట్లాడి వారి సమస్యలను తెలుసుకున్నారు.
​అనంతరం డాక్టర్ ధర్మాన కృష్ణచైతన్య విలేకరులతో మాట్లాడుతూ, తుఫాన్ కారణంగా సర్వం కోల్పోయిన రైతులకు ప్రభుత్వం తక్షణమే ఆర్థిక పరిహారం ప్రకటించాలని డిమాండ్ చేశారు. కొద్ది రోజుల్లో చేతికి అందాల్సిన పంటలు నీటిపాలు కావడంతో రైతులు తీవ్ర ఆవేదన చెందుతున్నారని పేర్కొన్నారు. రెవెన్యూ, వ్యవసాయ అధికారులు క్షేత్రస్థాయిలో పర్యటించి పారదర్శకంగా నష్టాన్ని అంచనా వేయాలని, ప్రతి బాధిత రైతుకూ పరిహారం అందించి ప్రభుత్వం భరోసా కల్పించాలని కోరారు. అదేవిధంగా వేట నిషేధ కాలంలో జీవనోపాధి కోల్పోయే మత్స్యకార కుటుంబాలకు నిత్యావసర సరుకులు అందజేసి తగిన తోడ్పాటు అందించాలని ప్రభుత్వాన్ని డిమాండ్ చేశారు.
​ఈ కార్యక్రమంలో ఎంపీపీ ముద్దాడ బైరాగి నాయుడు, రాష్ట్ర కార్యదర్శి కరిమి రాజేశ్వరరావు, చింతు రాఘవరావు, నందుపల్లి పైడయ్య, మాజీ ఏఎంసీ చైర్మన్ దుంపల భాస్కరరావు, మండల అధ్యక్షులు కణితి కృష్ణారావు, నియోజకవర్గ ఎస్సీ సెల్ అధ్యక్షులు కల్లేపల్లి లక్ష్మణరావు, మండల బూత్ కమిటీ అధ్యక్షులు చింతాడ ఉమామహేశ్వరరావు, మండల బీసీ సెల్ అధ్యక్షులు చింతు రామకృష్ణ, మండల యూత్ అధ్యక్షులు రెంటికోట త్రినాథరావు, మండల ఉపాధ్యక్షులు సుంకరి రాంబాబు, ఎంపీటీసీ పైల మల్లేశ్వరరావు, మాజీ రాష్ట్ర డైరెక్టర్ లండ ఎర్రయ్య తదితరులు పాల్గొన్నారు.