పశుగ్రాస సాగుకు రైతులకు ఎకరానికి రూ.69 వేల ఆర్థిక సహాయం

పాడి పశువులకు నాణ్యమైన పచ్చిమేత అందించడంతో పాటు, పశుపోషణ ఖర్చులను తగ్గించి రైతులకు ఆర్థిక ప్రయోజనం చేకూర్చే లక్ష్యంతో ప్రభుత్వం  వి బీకి రామ్ జి పథకం ద్వారా పశుగ్రాస సాగుకు ఆర్థిక సహాయం అందిస్తోందని పరవాడ సబ్ డివిజనల్ అసిస్టెంట్ డైరెక్టర్ డా. రామకృష్ణ కీర్తి తెలిపారు. పరవాడ మండలంలోని అర్హులైన పాడి రైతులందరూ ఈ పథకాన్ని సద్వినియోగం చేసుకోవాలని ఆయన కోరారు.ఈ పథకం కింద రైతులకు రెండు సంవత్సరాలకు కలిపి ఎకరానికి సుమారు రూ.69,000 ఆర్థిక సహాయం అందించనున్నట్లు తెలిపారు. ఎంపిక చేసిన భూమిలో సూపర్ నేపియర్ (కణుపు గడ్డి) మాత్రమే సాగు చేయాలని, ఇతర రకాల గడ్డిని సాగు చేయడానికి అనుమతి లేదని వివరించారు.
పశుగ్రాస సాగుకు దరఖాస్తు చేసుకునే రైతులు ఆధార్ కార్డు, జాబ్ కార్డు, పట్టాదారు పాస్‌బుక్, వన్‌బీ (1-బి) పత్రం, బ్యాంకు పాస్‌బుక్ జిరాక్స్ ప్రతులను సమర్పించాలి. భూమి తప్పనిసరిగా రైతు స్వంత పేరుపై ఉండాలని, పశుగ్రాస సాగుకు ఎంపిక చేసిన భూమి ఖాళీగా ఉండాలని తెలిపారు.
అర్హతలు కలిగిన రైతులు అవసరమైన పత్రాలతో వాడచీపురుపల్లి మరియు లంకెలపాలెం  పశువైద్యాధికార్లను సంప్రదించి పథకానికి సంబంధించిన పూర్తి వివరాలు తెలుసుకోవాలని డా. రామకృష్ణ కీర్తి సూచించారు. ప్రభుత్వ పథకాల ద్వారా లభించే అవకాశాలను వినియోగించుకుని పాడి అభివృద్ధికి, రైతుల ఆదాయం పెంపునకు కృషి చేయాలని ఆయన పిలుపునిచ్చారు.

రవికుమార్

ఎన్ డి పి సూర్య ప్రతినిధి