ఓటర్ల ప్రత్యేక సమగ్ర సవరణ గడువు పొడిగింపు!

ప్రొద్దుటూరు అర్బన్ మేజర్ న్యూస్:ఆంధ్రప్రదేశ్‌లో ఓటర్ల ప్రత్యేక సమగ్ర సవరణ (స్పెషల్ ఇంటెన్సివ్ రివిజన్) ప్రక్రియకు సంబంధించిన గడువును కేంద్ర ఎన్నికల సంఘం మరోసారి పొడిగించింది. రాష్ట్ర ప్రధాన ఎన్నికల అధికారి కార్యాలయం విడుదల చేసిన తాజా షెడ్యూల్ ప్రకారం ఓటరు జాబితాలో అభ్యంతరాలు, నోటీసులు, దరఖాస్తుల పరిశీలన, పరిష్కారానికి విధించిన గడువును అక్టోబర్ 22 నుంచి నవంబర్ 20, 2026 వరకు పొడిగించారు. అదేవిధంగా ఈ నెల 30న విడుదల కావాల్సిన తుది ఓటరు జాబితా ప్రచురణ తేదీని కూడా వాయిదా వేశారు. సవరించిన షెడ్యూల్ ప్రకారం నవంబర్ 30, 2026న తుది ఓటరు జాబితాను అధికారికంగా ప్రకటించనున్నారు. అర్హులైన ఏ ఒక్క ఓటరు కూడా జాబితాలో చోటు కోల్పోకూడదనే ఉద్దేశంతో గడువు పొడిగింపు నిర్ణయం తీసుకున్నట్లు ప్రకటనలో పేర్కొన్నారు. ఓటరు నమోదుతో పాటు ఓటరు జాబితాలో పేర్ల సవరణలు, చిరునామా మార్పులు, ఇతర అభ్యంతరాలు ఉన్నవారు నవంబర్ 20వ తేదీలోపు తమ ప్రాంత బూత్ స్థాయి అధికారి లేదా ఎలక్టోరల్ రిజిస్ట్రేషన్ అధికారి ని సంప్రదించి సమస్యలను పరిష్కరించుకోవాలని సూచించారు. మరిన్ని వివరాలు, ఆన్‌లైన్ ఓటరు సేవల కోసం భారత ఎన్నికల సంఘం అధికారిక వెబ్‌సైట్‌ను సందర్శించవచ్చని తెలిపారు.
ఈ మేరకు 132-ప్రొద్దుటూరు అసెంబ్లీ నియోజకవర్గ ఓటరు నమోదు అధికారి, స్పెషల్ డిప్యూటీ కలెక్టర్ వి. వెంకటపతి శుక్రవారం విడుదల చేసిన ప్రకటనలో వివరించారు.

రిపోర్టర్: ప్రతాప్, ప్రొద్దుటూరు అర్బన్, కడప జిల్లా