నదీ తీరప్రాంత గ్రామాల్లో అధికారుల పర్యటన..

నరసన్నపేట, అక్టోబర్ 27: తుఫాను హెచ్చరికల నేపథ్యంలో నరసన్నపేట మండల ప్రత్యేక అధికారి అనురాధ, నరసన్నపేట డిప్యూటీ ఎంపీడీవో,కమ్ ఎగ్జిక్యూటివ్ ఆఫీసర్ పిల్లా జాగన్మోహనరావు మంగళవారం తుఫాను ప్రభావం ఉండే అవకాశం ఉన్న వెంకటాపురం, అబూజియాపేట గ్రామాలను సందర్శించి పరిస్థితులను పరిశీలించారు.

ఈ సందర్భంగా గ్రామ ప్రజలకు తుఫాను ప్రభావంపై అవగాహన కల్పిస్తూ అప్రమత్తంగా ఉండాలని సూచించారు. వాతావరణ శాఖ, జిల్లా అధికారుల నుంచి వెలువడే సూచనలు, హెచ్చరికలను తప్పనిసరిగా పాటించాలని, అత్యవసర పరిస్థితులు ఎదురైతే సంబంధిత అధికారులను సంప్రదించి సహాయం పొందాలని తెలిపారు.

తుఫాను ప్రభావం ఉన్న సమయంలో అత్యవసరమైతే తప్ప బయటకు వెళ్లకూడదని, చెట్లు, విద్యుత్ స్తంభాలు, దెబ్బతిన్న భవనాలకు దూరంగా ఉండాలని సూచించారు. భారీ వర్షాలు, ఈదురుగాలుల సమయంలో వ్యక్తిగత భద్రతకు అత్యంత ప్రాధాన్యత ఇవ్వాలని పేర్కొన్నారు.

గ్రామస్థాయిలో పంచాయతీ కార్యదర్శులు, గ్రామ సచివాలయ సిబ్బంది, సంబంధిత శాఖల అధికారులు సమన్వయంతో పనిచేయాలని ఆదేశించారు. తుఫాను పరిస్థితులను ఎప్పటికప్పుడు పర్యవేక్షిస్తూ, ప్రజలకు అవసరమైన సమాచారాన్ని చేరవేయాలని, ముందస్తు జాగ్రత్త చర్యలు చేపట్టి ప్రజలకు అందుబాటులో ఉండాలని సూచించారు.