మునిసిపల్ ఎన్నికల భద్రతపై పోలీస్ యంత్రాంగం అప్రమత్తం

నేటి దినపత్రిక సూర్య బ్యూరో రాజమహేంద్రవరం 

రానున్న మున్సిపల్ ఎన్నికలను ప్రశాంతంగా, పారదర్శకంగా నిర్వహించేందుకు పోలీస్ యంత్రాంగం సర్వసన్నద్ధంగా ఉండాలని తూర్పుగోదావరి జిల్లా ఎస్పీ డి. నరసింహ కిషోర్ ఆదేశించారు. శుక్రవారం రాజమహేంద్రవరం వన్‌టౌన్, త్రీటౌన్ పోలీస్ స్టేషన్లను సందర్శించిన ఆయన, అధికారులతో ఎన్నికల భద్రతా ఏర్పాట్లపై సమీక్ష నిర్వహించి దిశానిర్దేశం చేశారు. క్రిటికల్ పోలింగ్ కేంద్రాలు, సమస్యాత్మక, అత్యంత సమస్యాత్మక ప్రాంతాలు మరియు పోలింగ్ కేంద్రాలను గుర్తించి పటిష్ట నిఘా, ప్రత్యేక భద్రత ఏర్పాటు చేయాలని ఆదేశించారు. 

ముందస్తు చర్యలగా బైండోవర్లు, పాత నేరస్తులు, రౌడీషీటర్లపై నిరంతర నిఘా ఉంచాలని, గొడవలకు పాల్పడే అవకాశం ఉన్నవారిపై బైండోవర్ చర్యలు తీసుకోవడంతో పాటు పెండింగ్ నాన్-బెయిలబుల్ వారెంట్లను తక్షణమే అమలు చేయాలని అన్నారు.  ఎన్నికల వేళ అసత్య వార్తలు, వదంతులు, రెచ్చగొట్టే పోస్టులను ప్రచారం చేసేవారిపై సోషల్ మీడియా కాదనాలపై కఠిన చట్టపరమైన చర్యలు తీసుకునేందుకు నిరంతర నిఘా ఉంచాలని అన్నారు. ప్రతి పోలీస్ స్టేషన్ పరిధిలోని వార్డులు, ప్రాంతాలు, పోలింగ్ కేంద్రాలకు సంబంధించిన పూర్తి సమాచారాన్ని అధికారులు, సిబ్బంది అందుబాటులో ఉంచుకోవాలని, స్థానిక ప్రజలతో సమన్వయం చేసుకుంటూ క్షేత్రస్థాయిలో నిరంతరం సమాచారాన్ని సేకరించి శాంతిభద్రతలకు సంబంధించిన పరిణామాలను ఎప్పటికప్పుడు ఉన్నతాధికారులకు నివేదించాలని సూచించారు.

పటిష్ట బందోబస్తు...మునుపటి ఎన్నికల కేసుల దర్యాప్తును వేగవంతం చేయాలని, ఎన్నికల ప్రక్రియ పూర్తయ్యే వరకు సిబ్బంది అంతా పూర్తి అప్రమత్తతతో విధులు నిర్వర్తించాలని అన్నారు. సమావేశంలో సెంట్రల్ జోన్ అసిస్టెంట్ ఎస్పీ తరుణ్ పహ్వా,  వన్‌టౌన్ పోలీస్ స్టేషన్ ఇన్స్పెక్టర్ ఎన్.మురళి కృష్ణ, త్రీ టౌన్ పోలీస్ స్టేషన్ ఇన్స్పెక్టర్ వి. అప్పారావు, డి.సి.ఆర్.బి ఇన్స్పెక్టర్ ఈ. పవన్ కుమార్ రెడ్డి, ఎస్.బి ఇన్స్పెక్టర్  ఏ.శ్రీనివాసురావు, పోలీస్ స్టేషన్ ఎస్సై లు మరియు సిబ్బంది  పాల్గొన్నారు.