మహిషాసురమర్దినిగా కనకదుర్గమ్మ.. మహానవమి వేళ ఇంద్రకీలాద్రిపై దివ్య వైభవం

ఇంద్రకీలాద్రి మేజర్ న్యూస్ : మహానవమి పర్వదినాన్ని పురస్కరించుకుని ఇంద్రకీలాద్రిపై కొలువుదీరిన శ్రీ కనకదుర్గమ్మవారు శ్రీ మహిషాసురమర్దిని దేవిగా భక్తులకు దర్శనమిస్తున్నారు. మహిషాసురుడిని సంహరించి లోకాలకు శాంతిని ప్రసాదించిన ఆదిపరాశక్తి దివ్యస్వరూపాన్ని దర్శించుకునేందుకు భక్తులు తరలివస్తున్నారు. దుష్టశక్తుల సంహారం, ధర్మ పరిరక్షణ, భక్తజనుల అభయానికి ప్రతీకగా అమ్మవారి మహిషాసురమర్దిని అలంకారం భక్తులను విశేషంగా ఆకట్టుకుంటోంది. దేవతల శక్తుల సమాహారంగా అవతరించిన దుర్గాదేవి మహిషాసురుడితో ఘోర సంగ్రామం చేసి విజయం సాధించినట్లు దేవీ మహాత్మ్యం తెలియజేస్తోంది. ఈ రూపం అహంకారంపై ఆత్మశక్తికి, అధర్మంపై ధర్మానికి ప్రతీకగా నిలుస్తూ భక్తుల్లో ధైర్యం, ఆత్మవిశ్వాసాన్ని నింపుతోంది. మహానవమి అలంకారంలో అమ్మవారికి ముదురు ఎరుపు రంగు చేనేత చీరను సమర్పించారు. శక్తి, పరాక్రమం, చైతన్యానికి ప్రతీకగా భావించే ఎరుపు రంగు వస్త్రధారణలో దివ్యాభరణాలు, పుష్పాలంకరణలతో అమ్మవారు భక్తులకు కనువిందు చేస్తున్నారు. మహానవమి వేళ జగన్మాతను దర్శించుకుంటున్న భక్తులు తమ కష్టాలు తొలగి, సుఖశాంతులు కలగాలని ప్రార్థిస్తున్నారు. శరన్నవరాత్రుల ఆధ్యాత్మిక వైభవంలో విశిష్టమైన మహానవమి సందర్భంగా ఇంద్రకీలాద్రిపై అమ్మవారి దివ్యమంగళ స్వరూపం భక్తుల్లో భక్తిభావాన్ని, ధర్మనిష్ఠను మరింత పెంపొందిస్తోంది.
 

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.