కాకాణితో వైసీపీ మేయర్ చీఫ్ ఏజెంట్ ఆనం కార్తీక్ భేటీ
నెల్లూరు సిటీ, మేజర్ న్యూస్ : వైఎస్సార్ కాంగ్రెస్ పార్టీ జిల్లా అధ్యక్షుడు కాకాణి గోవర్ధన్ రెడ్డితో ఆ పార్టీ మేయర్ చీఫ్ ఏజెంట్ ఆనం కార్తీక్ భేటీ అయ్యారు. ఈ సందర్భంగా నెల్లూరు నగర మేయర్ ఎన్నికలతో పాటు నెల్లూరు రూరల్ పరిధిలోని అభ్యర్థుల వివరాలు, ఎన్నికల పరిస్థితులు, గెలుపోటములపై ఇరువురు నేతలు చర్చించినట్లు సమాచారం. ఎన్నికల చివరి రోజు అనుసరించాల్సిన వ్యూహం, పార్టీ శ్రేణుల సమన్వయం తదితర అంశాలపై చర్చించినట్లు తెలిసింది. టీడీపీ భారీగా ఆర్థిక వనరులను వినియోగిస్తోందన్న నేపథ్యంలో ఎన్నికల ప్రచారం, పోలింగ్ నిర్వహణపై కూడా నేతలు సమాలోచనలు జరిపినట్లు సమాచారం. మేయర్ ఎన్నికకు సంబంధించిన పోస్టల్ బ్యాలెట్ ప్రక్రియ సందర్భంగా కస్తూర్బా కళాక్షేత్రంలో చోటుచేసుకున్నాయని ఆరోపిస్తున్న అధికార పార్టీ దౌర్జన్యాల గురించి ఆనం కార్తీక్ కాకాణి గోవర్ధన్ రెడ్డికి వివరించినట్లు పార్టీ వర్గాలు తెలిపాయి.
