ఇంద్రకీలాద్రిపై వైభవంగా శరన్నవరాత్రి ఉత్సవాలు: నేడు లలితా త్రిపురసుందరీ దేవిగా దుర్గమ్మ దర్శనం..
విజయవాడ, సూర్య ప్రతినిధి : విజయవాడ కనకదుర్గమ్మ ఆలయమైన ఇంద్రకీలాద్రిపై దసరా శరన్నవరాత్రి ఉత్సవాలు నేత్రపర్వంగా సాగుతున్నాయి. ఉత్సవాల్లో భాగంగా ఐదో రోజైన నేడు శ్రీ కనకదుర్గమ్మవారు భక్తులకు లలితా త్రిపురసుందరీ దేవి అలంకారంలో అభయమిస్తున్నారు. అమ్మవారిని దర్శించుకునేందుకు ఉదయం నుంచే భక్తులు భారీగా తరలివస్తున్నారు. గోవింద, అమ్మవారి నామస్మరణతో ఇంద్రకీలాద్రి మార్మోగుతోంది.
ఇక ఉత్సవాల్లో అత్యంత కీలకమైన, పవిత్రమైన మూలా నక్షత్రం పర్వదినం కావడంతో రేపు (శుక్రవారం) రాష్ట్ర ప్రభుత్వం తరఫున ముఖ్యమంత్రి నారా చంద్రబాబు నాయుడు దంపతులు అమ్మవారికి అధికారికంగా పట్టువస్త్రాలు సమర్పించనున్నారు.
మూలా నక్షత్రం రోజైన రేపు అమ్మవారు జ్ఞాన సరస్వతీ దేవి రూపంలో భక్తులకు దర్శనమివ్వనున్నారు. సీఎం పర్యటన మరియు మూలా నక్షత్రం రద్దీని దృష్టిలో ఉంచుకుని ఆలయ అధికారులు, పోలీసులు పటిష్టమైన భద్రతా ఏర్పాట్లు చేశారు. భక్తులకు ఎలాంటి అసౌకర్యం కలగకుండా క్యూలైన్లు, ప్రత్యేక దర్శనాలపై ప్రత్యేక దృష్టి సారించారు.
