ఘనంగా పాటూరి రాజగోపాల్ నాయుడు 29వ వర్ధంతి

తిరుపతి:

ప్రజాసేవకు అంకితమైన నాయకుడు, మాజీ పార్లమెంట్ సభ్యులు స్వర్గీయ  పాటూరి రాజగోపాల్ నాయుడు 29వ వర్ధంతి సందర్భంగా చిత్తూరు జిల్లా తవణంపల్లి మండలం దిగువమాఘం గ్రామంలో స్మారక కార్యక్రమాన్ని ఘనంగా నిర్వహించారు.ఈ సందర్భంగా అమర రాజా గ్రూప్ వ్యవస్థాపక చైర్మన్ గల్లా రామచంద్ర నాయుడు, మాజీ మంత్రి  గల్లా అరుణ కుమారి, అమర హాస్పిటల్స్ మేనేజింగ్ డైరెక్టర్ డా. గౌరీనేని రమాదేవి  రాజన్న మెమోరియల్ పార్క్‌లోని స్వర్గీయ రాజగోపాల్ నాయుడు  విగ్రహానికి పూలమాలలు సమర్పించి ఘనంగా నివాళులర్పించారు.ఈ సందర్భంగా గల్లా రామచంద్ర నాయుడు గారు మాట్లాడుతూ రాజగోపాల్ నాయుడు ప్రజలకు ఎంతో ఆత్మీయంగా ఉండేవారు. ప్రజల సమస్యలను తెలుసుకుని, వారి సంక్షేమం కోసం నిరంతరం కృషి చేశారు. ఆయన చేసిన సేవలను ఈ సందర్భంగా స్మరించుకోవడం మనందరి బాధ్యత. ఆయన ఆశయాలు, ప్రజాసేవా స్ఫూర్తి ఎప్పటికీ గుర్తుండిపోతాయి అని పేర్కొన్నారు.

గల్లా అరుణ కుమారి మాట్లాడుతూ, రాజగోపాల్ నాయుడు ప్రజల మనిషిగా అందరి హృదయాల్లో నిలిచిపోయారు. ప్రజలతో ఆయనకు ఉన్న అనుబంధం, సమాజం పట్ల ఆయనకున్న నిబద్ధత ఎంతో గొప్పవి. ఆయన సేవలను స్మరించుకుంటూ ఆయన చూపిన మార్గంలో నడవడం ఆయనకు మనం అందించే నిజమైన నివాళి అని అన్నారు.ఈ కార్యక్రమంలో రాజన్న ఫౌండేషన్ హెడ్ రాళ్లపల్లి సతీష్, మాజీ సర్పంచులు కుమార్ నాయుడు, మహేష్ కుమార్, గోపి, పరంధామ నాయుడు, బంగారుపాళ్యం వ్యవసాయ మార్కెట్ కమిటీ (ఏఎంసీ) చైర్మన్ భాస్కర్ నాయుడు, మాజీ జెడ్పీటీసీ వెంకటేష్ తదితరులు పాల్గొన్నారు. ఈ కార్యక్రమంలో విద్యార్థులు, గ్రామస్థులు భజనలు, కోలాట ప్రదర్శనలు నిర్వహించి స్వర్గీయ రాజగోపాల్ నాయుడుకి నివాళులర్పించారు. గ్రామస్థులు, అభిమానులు పెద్ద సంఖ్యలో పాల్గొని ఆయన ప్రజాసేవలను స్మరించుకున్నారు.