గీతా మందిరం వద్ద అఖండ అన్నసమారాధన వెయ్యి మందికి పైగా భక్తులకు అన్నప్రసాద వితరణ

టి.నరసాపురం, సూర్య న్యూస్: గీతా మందిరం వద్ద నిర్వహించిన దసరా శరన్నవరాత్రి ఉత్సవాలు మంగళవారంతో ముగిశాయి. ఈ సందర్భంగా బుధవారం ఆలయ ఉత్సవ కమిటీ ఆధ్వర్యంలో అఖండ అన్నసమారాధన కార్యక్రమాన్ని ఘనంగా నిర్వహించారు.ఈ కార్యక్రమానికి ముఖ్య అతిథులుగా టి.నరసాపురం సబ్‌ ఇన్‌స్పెక్టర్ జయబాబు దంపతులు హాజరై అన్నదాన కార్యక్రమాన్ని ప్రారంభించారు. ఉదయం నుంచే ఆలయానికి విచ్చేసిన భక్తులకు ఎలాంటి ఇబ్బందులు కలగకుండా ఆలయ ప్రాంగణంలో అన్నప్రసాద వితరణకు ఉత్సవ కమిటీ సభ్యులు ఏర్పాట్లు చేశారు. ఈ అన్నసమారాధనలో వెయ్యి మందికి పైగా భక్తులు అన్నప్రసాదాన్ని స్వీకరించినట్లు ఆలయ నిర్వాహకులు తెలిపారు.

ఈ సందర్భంగా ఎస్‌ఐ జయబాబు మాట్లాడుతూ, దసరా శరన్నవరాత్రి ఉత్సవాలను గ్రామంలోని వివిధ ప్రాంతాల్లో ఎలాంటి అవాంఛనీయ సంఘటనలు జరగకుండా, భక్తిశ్రద్ధలతో ఘనంగా నిర్వహించిన ఆలయాల ఉత్సవ కమిటీ సభ్యులను అభినందించారు. పండుగల సమయంలో భక్తుల భద్రతకు ప్రాధాన్యతనిస్తూ ఉత్సవాలను ప్రశాంత వాతావరణంలో నిర్వహించడం అభినందనీయమని పేర్కొన్నారు.

ఎస్‌ఐ దంపతులకు సన్మానంఅనంతరం గీతా మందిరం ఉత్సవ కమిటీ సభ్యులు ఎస్‌ఐ జయబాబు, ఆయన సతీమణి జ్యోతి దంపతులను శాలువాలతో ఘనంగా సన్మానించారు. అన్నసమారాధన కార్యక్రమం భక్తుల సందడితో ఆధ్యాత్మిక వాతావరణంలో కొనసాగింది.

 క్రైమ్ రిపోర్టర్: అద్దంకి గిరి కుమార్ ఏలూరు జిల్లా