ఈసీ నిర్ణయాలకు వ్యతిరేకంగా మడకశిరలో కాంగ్రెస్ నిరసన

అనంతపురం బ్యూరో 

ఈసీ నిర్ణయాలకు వ్యతిరేకంగా మడకశిరలో కాంగ్రెస్ నిరసన

 భారత ఎన్నికల సంఘం తీసుకుంటున్న పలు నిర్ణయాలకు నిరసనగా కాంగ్రెస్ పార్టీ ఆధ్వర్యంలో మడకశిరలో నిరసన కార్యక్రమం నిర్వహించారు. శ్రీ సత్యసాయి జిల్లా మడకశిరలోని ఎంపీడీవో కార్యాలయం వద్ద మహాత్మా గాంధీ విగ్రహానికి పూలమాల వేసి కాంగ్రెస్ వర్కింగ్ కమిటీ (CWC) సభ్యుడు ఎన్. రఘువీరా రెడ్డి నిరసనను ప్రారంభించారు.

ఈ సందర్భంగా రఘువీరా రెడ్డి మాట్లాడుతూ.. కేంద్ర ఎన్నికల సంఘం తీసుకుంటున్న పలు నిర్ణయాలు ప్రజాస్వామ్య స్ఫూర్తికి విరుద్ధంగా ఉన్నాయని ఆరోపించారు. ఓటర్ల జాబితా, ఎన్నికల ప్రక్రియకు సంబంధించిన అంశాల్లో పారదర్శకత, జవాబుదారీతనం ఉండాల్సిన అవసరం ఉందని పేర్కొన్నారు.

ఎన్నికల సంఘం వైఖరికి వ్యతిరేకంగా గాంధీ విగ్రహం వద్ద కాంగ్రెస్ నాయకులు, కార్యకర్తలు పెద్ద ఎత్తున నినాదాలు చేశారు. కార్యక్రమంలో మాజీ ఎమ్మెల్యే సుధాకర్‌తో పాటు నియోజకవర్గానికి చెందిన కాంగ్రెస్ నాయకులు, కార్యకర్తలు పాల్గొన్నారు.

కేంద్ర ఎన్నికల సంఘం నిర్ణయాలను పునఃపరిశీలించి ప్రజాస్వామ్య విలువలు, ఓటర్ల హక్కులకు అనుగుణంగా చర్యలు తీసుకోవాలని కాంగ్రెస్ నాయకులు డిమాండ్ చేశారు.